Алматы облысында құрғақ шөптің жануы салдарынан өрт шығып , 3 адамның денесі табылды.

Бұл туралы облыстық Төтенше жағдайлар департаментінің баспасөз қызметі хабарлады, деп жазады inbusiness.kz сайты.

Ресми мәліметке сәйкес, өрт жалпы 30 гектар аумақты шарпыған. Салдарынан 7 саяжай үйі, ауданы 531 шаршы метр болатын 6 шаруашылық нысаны, Honda Civic маркалы автокөлік, 132 шаршы метрлік шөпқора және 80 шаршы метрлік тұрғын үй зақымданған.

Өртті сөндіруге Алматы облысы және Алматы қаласы ТЖД қызметкерлері, сондай-ақ жергілікті атқарушы органдардан барлығы 27 адам мен 10 техника жұмылдырылды. Қызыл жалын 00:20-да оқшауланған.

Оқиға орнынан 3 адамның мәйіті табылды. Марқұмдардың жеке басын анықтау үшін сот-медициналық сараптама тағайындалды. Өрттің шығу себебін анықтау мақсатында тергеу жүргізіліп жатыр.