Белгілі театр және кино майталманы Асанәлі Әшімовтің көлігіндегі ерекше номер әлеуметтік желіде қызу талқыға түсті, деп хабарлайды Skifnews.kz ақпарат порталы.

Желіде тараған бейнежазбада қара түсті жол талғамайтын көліктің мемлекеттік номер орнына «ASANALI» деген жазу тағылғаны байқалады. Ал көліктің қасында арнайы қызметтік полиция көлігі ілесіп жүрген. Жол жиегінде тоқтаған сәтте бірнеше полиция қызметкері өнер тарланына құрметпен амандасып жатыр.

Бұл жағдайға қатысты пікір екіге бөлінді: желі қолданушыларының бір бөлігі мұны заңсыздық десе, енді бірі аңыз тұлғаға көрсетілген құрмет ретінде бағалап отыр.

«Асанәлі Әшімовке заң жүрмей ме сонда? Номерсіз жүреді екен. Полицейлер тоқтатпақ түгілі, қолын сүйейін деп тұр ғой», «Жаңа Қазақстан деген осы ма?», «Барлығына бірдей тәртіп болуы керек, әйтпесе өзгелер де еліктейді» деген сын пікірлер жазылса, басқа қолданушылар: «Міне, нағыз құрмет», «Керемет», «Асанәлі біреу-ақ қой, жүре берсін» деп жылы лебіздерін білдірген.

Айта кетсек, биыл 85 жасқа толып отырған Асанәлі Әшімов – кеңестік және қазақстандық театр, кино актёрі әрі режиссёр, ұстаз, профессор. Ол – Қазақ КСР халық артисі, КСРО халық артисі, Қазақ КСР мемлекеттік сыйлығының және КСРО мемлекеттік сыйлығының лауреаты.