Қазақстандық журналист Әділ Балтабаев өзінің Telegram-арнасында Қытай басшысы Си Цзиньпин қазір Қытайда жүрген Қасым-Жомарт Тоқаевқа ерекше ілтипат танытқаны туралы жазды, деп хабарлайды KAZ.NUR.KZ.
Балтабаев — президент Тоқаевтың Қытайға сапарына бірге аттанған журналистердің бірі. Оның айтуынша, Қытай басшысы Си Цзиньпин келген 22 көшбасшының тек үшеуіне ғана жеке қабылдау ұйымдастырған. Құрметті қонақтар қатарында Қасым-Жомарт Тоқаев та бар.
"Кешкі ас екі сағатқа жуық уақытқа созылды — хатамаға сай "құрғақтықсыз", сенімге әрі достық қарым-қатынасқа толы жағдайда. Дастархан басында "қымбатты досым" деген сөз бір емес, бірнеше рет айтылып, әрбір әрекетінен қазақстандық делегацияға деген ерекше ілтипат сезілді.
Мұндай қарым-қатынас Қазақстан-Қытай байланысының қазіргі деңгейі дипломатиялық этикет аясынан әлдеқашан шығып кеткенін айқын көрсетеді. Мемлекет басшысының екі ел арасындағы қарым қатынасты "ауа райын талғамайтын" деп бағалауы тегін емес, ал Си Цзиньпин болса, (екі ел арасындағы қарым қатынасты — ред. ескертпесі) "әлемдік саясаттағы өзгерістерге тәуелді емес" деп бағалады. Президентті алда қарбалас күндер күтіп тұр: ШЫҰ және "ШЫҰ плюс" саммиттері, Бейжіңдегі іскерлік кеңес және жаңа келіссөздер", — делінген жазбада.
Жақында Қасым-Жомарт Тоқаев Қытайдың ағылшын тіліндегі жетекші China Daily басылымында мақала жариялап, Қазақстан мен Қытай арасындағы берік байланыстың маңыздылығын атап өтті.
Еске салсақ, президент Қасым-Жомарт Тоқаев Шанхай ынтымақтастық ұйымының саммитіне қатысу үшін Тяньцзинь қаласына барған болатын. Мемлекет басшысы Қасым-Жомарт Тоқаев Си Цзиньпиннің шақыруымен Қытай Халық Республикасына баратыны 26 тамызда белгілі болды. Бағдарлама 30 тамыз бен 3 қыркүйек аралығына жоспарланғаны хабарланды.
Ал 16 маусымда ҚХР төрағасы Си Цзиньпин Қазақстан президенті Қасым-Жомарт Тоқаевтың шақыруымен Астанаға келген болатын. Одан кейін екі ел басшылары келіссөздер жүргізді. Қасым-Жомарт Тоқаев Си Цзиньпинді туған күнімен құттықтап, оның Қазақстанға сапары бұл атаулы күнмен тұспа-тұс келгенінің символдық мәнін атап өтті.
Келіссөздер қорытындысы бойынша 24 үкіметаралық және ведомствоаралық құжатқа қол қойылды. Ақордада ҚХР төрағасы Си Цзиньпин Қазақстан президентіне қазақ жерінде жылы қарсы алғаны үшін алғыс білдірді.
Сондай-ақ Астанада алты ел президенттерінің қатысуымен екінші "Орталық Азия-Қытай" саммиті өтті. Саммит барысында Қасым-Жомарт Тоқаев көрші елдің атом энергетикасын дамытудағы табысты тәжірибесі туралы айтты. Сонымен қатар Тоқаев Қытайдан Орталық Азия елдеріне жүк тасымалының ұлғаюына тоқталып, Каспий теңізінде терминал құруды ұсынды.
Тоқаев сондай-ақ киберқылмыспен бірлесіп күресу қажеттігін де айтты. Кейін Тоқаев, Си Цзиньпин мен Орталық Азия елдерінің президенттері Астана декларациясына қол қойды.
Мәтіннен қате тапсаңыз, бізге жазыңыз
