Алматыда Уәлиханов саябағындағы жөндеу жұмыстары төңірегінде дау шықты. Әлеуметтік желілерде брусчатканың (тас төсеніштің) алынып жатқаны түсірілген видео тарап, жазба астына наразылық жазылды. Tengrinews.kz негізгі деректерді жинап, қазіргі жағдайды баяндады, — деп хабарлайды Massaget.kz тілшісі.

Даудың басталуы

Желіде Уәлиханов бульварындағы брусчатканың (тас төсеніштің) алынып жатқаны түсірілген видео пайда болды. Видео авторы оны тиеген жүк көлігін Алматы облысындағы бір үйдің ауласына дейін бақылап барған. Сол жерде тұрғындар бұл материалды "сатып алғанын" айтқандай болған. Кейінгі даудан соң екінші көлік жеке үйге жетпей, кері бұрылып, әкімдік базасына жеткізілген.

Әкімдік жауабы

Аудан әкімдігі бұған дейін плитканың бір бөлігі мердігердің келісімімен Алматы облысындағы "көмекке мұқтаж отбасыға" берілгенін хабарлады. Алайда видеодағы үйдің сыртқы түрі әжептәуір жақсы көрінеді.

Медеу ауданының әкімі Еркебұлан Оразалин тас төсеуішті не үшін ауыстыру қажет болғанын түсіндірді. Оның сөзінше, Уәлиханов саябағында кешенді абаттандыру жүріп жатыр: брусчатка, бордюр, темір қоршаулар ауыстырылады, көше шамдары жаңартылады, автосуару жүйесі, көгалдандыру және шағын сәулет нысандары орнатылады. Бұл жұмыстарға 296 млн теңге бөлінген. Қосымша 204 млн теңге Қарасай батыр саябағын абаттандыруға қарастырылған.

Әкім брусчатка 2004 жылы төселгенін, 2024 жылы оны ішінара жөндеуге тырысқанын айтты. Бірақ дәл мұндай тас төсеуішті табу мүмкін болмағандықтан, толық ауыстыру туралы шешім қабылданған.

Қала тұрғындарының сұрақтары

Кей пікірлер әкімнің видео түсірген жеріне қатысты болды: ол Қарасай батырдағы шынымен тозған плитканы көрсетті, бірақ жұрт Уәлиханов саябағына қатысты даудың дәл сол жерде екенін, онда брусчатканың "жаңа сияқты" екенін айтады.

Жұмыс бағасы да қызу талқыда. Кей қолданушылар сметадағы шаршы метр бағасы нарықтан әлдеқайда жоғары деп, қоршаулар мен орындықтарды толық ауыстырудың қажетін күмәнға алды. Олардың ойынша, оларды бояп-ақ қоюға болар еді. Тағы бір сын – бюджетке: қала орталығында брусчатка жаңарғанымен, шеткі аудандарда жол, арық, кәріз мәселелері шешілмей тұр.

Келесі қадамдар

Бұл жағдай тек жергілікті деңгейде емес, бюджет шығындары мен қаланы жөндеу басымдықтары жайлы кеңірек пікірталасқа ұласты. Пікір қалдырушылар Алматы әкімі Дархан Сатыбалдыны, Антикор мен прокуратураны белгілеп, назар аударуды сұрап жатыр. Редакция да тиісті органдарға ресми сауалдар жіберген.

Өзекті жаңалықтарды өз уақытында оқу үшін Facebook парақшамызға жазылыңыз!