Астана қаласының мамандандырылған ауданаралық қылмыстық істер жөніндегі соты мемлекеттік қорғаныс тапсырысы саласындағы қаражат жымқыру дерегі бойынша резонанстық істі қарауды аяқтады. Бұл туралы Қаржылық мониторинг агенттігіне сілтеме жасаған KAZ.NUR.KZ хабарлайды.

Агенттіктің мәліметінше, 2023 жылы Қаржылық мониторинг агенттігімен "Казспецэкспорт" РМК-ның лауазымды тұлғалары мен теріс пиғылды жеткізушілер ұсталып, әскери мақсаттағы өнімдерді сатып алуға бөлінген бюджет қаражатын жымқырды және сыбайлас жемқорлық деректері бойынша айып тағылған болатын.

Мемлекетке келтірілген залал 1,6 млрд теңгеден асқан.

Сот үкімімен "Казспецэкспорт" РМК бас директоры Рамазанов А.К. 11 жылға, кәсіпорынның департамент директоры Кудабаев А.Т. 10 жылға бас бостандығынан айырылған. Қалған 9 айыпталушы да әртүрлі мерзімге бас бостандығынан айырылған.

Сонымен қатар сот мемлекет пайдасына 1,6 млрд теңге көлеміндегі азаматтық талап-арызды қанағаттандырып, жалпы құны 607 млн теңге болатын мүлікті тәркіледі.

Үкім заңды күшіне енген жоқ.

Мәтіннен қате тапсаңыз, бізге жазыңыз