Бұл туралы Мәжіліс депутаты Бақытжан Базарбек мәлімдеді.

Алматыда Rams Beyond атты 40 қабатты мұнараның құрылыс-монтаждау жұмыстары уақытша тоқтатылды, деп жазады inbusiness.kz сайты.

Депутаттың айтуынша, рейд барысында қала әкімдігінің қала құрылысы бақылау басқармасы құрылыс компаниясына ресми нұсқама тапсырған.

Тұрғындар әу бастан Тимирязев-Сейфуллин қиылысы маңындағы ауданның онсыз да шамадан тыс жүктелгенін, көлік қозғалысы мен тұрғын үй тығыздығы жоғары екенін айтқан. Сонымен қатар жақын маңда бірде-бір жасыл желектің жоқтығын ешкім ескермеген. Алматылықтар көпқабатты мұнараның орнына қоғамдық саябақ салу керек деп есептейді.

Ал, құрылыс ережесі бойынша Абай мен Әл-Фараби даңғылдарының арасындағы аймақта ғимараттардың биіктігі 9 қабаттан аспауға тиіс.

Қалалық жоспарлау және урбанистика басқармасының түсіндіруінше, тоғыз қабаттан жоғары ғимараттарды салуға олардың қоғамдық маңыздылығы дәлелденген жағдайда және белгілі талаптар сақталғанда ғана рұқсат беріледі.

Бұған дейін президент Қасым-Жомарт Тоқаев қала әкімі Дархан Сатыбалдыға Алматының жоғарғы бөлігіне көпқабатты тұрғын үй кешендері мен нүктелік құрылыстар салуға мораторий енгізуді тапсырған болатын.