Жамбыл облысында балаларға қатыгездік көрсету фактісі бойынша тергеу аяқталып, іс прокуратураға жіберілді. Бұл туралы ІІМ баспасөз қызметіне сілтеме жасаған KAZ.NUR.KZ хабарлайды.

ІІМ-ның ресми Telegram-каналындағы ақпаратқа сәйкес, екі кәмелетке толмаған баланы жүйелі түрде ұрып-соққан деген кұдікке ілінген Талас ауданының тұрғынына қатысты қылмыстық іс тергеліп бітіп, айыптау актісімен бірге прокурорға жіберілді. Бұл істі сот қарайтын болады.

"Еске сала кетейік, бұған дейін полиция күдіктіні дереу қолға түсіріп, ол қамауға алынған еді. Жапа шеккен балалар Тараз қаласындағы Балаларды қолдау орталығына орналастырылып, оларға қажетті психологиялық және құқықтық көмек көрсетілді", — делінген ресми хабарламада.

Аталған қылмыстық істің тергеуі Ішкі істер министрінің тікелей бақылауында болды.

Айта кетейік, тамыз айының басында Жамбыл облысында құлдықта болған балалар туралы ақпарат тараған болатын. Оқиғаға қатысты қылмыстық іс қозғалды.

Мәтіннен қате тапсаңыз, бізге жазыңыз