Жүйелік оператор арнайы кесте бекіткен.

Энергетика министрі Ерлан Ақкенженов Үкімет отырысында алдағы жылыту маусымына дайындық жұмыстары қалай жүргізіліп жатқанын баяндады, деп хабарлайды inbusiness.kz сайты.

"Алдағы жылыту маусымына дайындық шеңберінде Жүйелік оператор бекіткен графикке сәйкес осы жылы электр станцияларында 10 энергия блогын, 63 қазандықты және 39 турбинаны жөндеу жоспарланған. 4 энергия блогында, 31 қазандықта және 20 турбинада жөндеу жұмыстары әртүрлі кезеңдерде жүргізілуде. 5 энергия блогында, 22 қазандықта және 12 турбинада жөндеу жұмыстары аяқталды. Энергетикалық көздер бойынша жөндеу жұмыстарына 376,7 млрд теңге игеру жоспарлануда, бұл өткен жылғы деңгейден 13%-ға жоғары", — деді ведомство басшысы.

Министрдің мәліметінше, аймақтық электржелілік компаниясының электр желілерінде жалпы ұзындығы 17 мың км электр беру желілерін, 420 қосалқы станцияны, 3,5 мың тарату пункттерін және трансформаторлық қосалқы станцияларды жөндеу жоспарланған.

"Электр беру желілерінің 77%-ы, қосалқы станциялардың 68%-ы және тарату пункттері мен трансформаторлық қосалқы станциялардың 73%-ы жөнделді. Жылумен жабдықтау желілерінде 323 км жылу желілерін реконструкциялау және күрделі жөндеу бойынша жөндеу жұмыстары жоспарланған. 215 км немесе 66% орындалды. Барлық жөндеу жұмыстары мерзімінде аяқталады", — деді Ерлан Ақкенженов.