Жолаушылар пойызы кешікпес үшін қомақты инвестиция құйып, теміржол желісін толыққанды жаңғыртпақ керек. Бүгінде шойын жолдың 57%-і тозған, деп хабарлайды 24kz.

Көлік министрі мұны: «Жаға ұстатарлық жағдай емес – әлемдік тәжірибедегі қалыпты көрсеткіш», — деп түсіндірді. Ал мәселені шешу үшін жыл сайын орта есеппен теміржолдың 1400 шақырымы жөнделеді екен. Осы ретте вокзалдар мен рельстерді жаңартуға қыруар қаржы жұмсалатыны белгілі. Ал оның салмағы кімге түседі? Билет құны қымбаттамай ма?

Бақыт Топтаева, тілші:

- «Қазақстан темір жолы» цифрлық жобаларға 1 трлн теңге қарастырып отыр. Осылайша, пойыздардың қатынау жиілігін едәуір арттырмақ ниетте. Көлік министрі цифрлық жобалардың қалай жүзеге асырылатынын нақты мысал келтіре отырып түсіндірді.

Нұрлан Сауранбаев, ҚР Көлік министрі:

- Сексеул – Жезқазған арасында 8 пойыз ғана жүретін. Цифрландыру арқылы ол жерде 25 пойыз жүретін болады. Оны цифрландыру дедік: автоматты басқару жүйесі. Автоматтандыру арқылы 8-ден 25 пойызға дейін көтереді.

Бақыт Топтаева, тілші:

- Еліміздің барлық бағыты бойынша тальго вагондары тіркелген 26 құрам қатынайды. Бұл – ұзын-саны 700 вагон. Олардың бертінде құрастырылғаны 30 жылдай, ал оған дейінгілері әлі 19 жылдай шойын жолда қызмет етеді. Сағатына 160 шақырымды еңсере алатын жүрдек пойыз әу баста жолды қысқарту мақсатында іске қосылған еді. Бірақ ішінің тарлығына байланысты халықтың сынына ұшырады.

Нұрлан Сауранбаев, ҚР Көлік министрі:

- Әжелер ауылдан ұшақпен тасуға қиындық туғызатын ет, қазы, шұбатты теміржолмен жеткізеді. Қаладағы немерелеріне базарлық деп апарады. Сөйтіп, пойыз азық-түлік тасымалы үшін де, әлеуметтік маңызға ие көлік құралына айналған. Сондықтан халық вагондардың сыйымды болғанын қалайды. Штадлер вагондары үлкендеу келеді, бұрынғы вагондарымызға ұқсас.

Бақыт Топтаева, тілші:

- Министрдің айтуынша, су жаңа штадлер вагондары жыл соңына дейін қолданысқа беріледі. Жалпы 2029 жылға дейін 7 мыңнан астам жаңа вагон алынады. Бүгінде жолаушылар пойызының кешігуі 37%-ке қысқарған. Алайда бұл мәселе түбегейлі шешілді деген сөз емес. Теміржол желісінің тең жартысы тозғандықтан, оларды жөндеу – күн тәртібіндегі өзекті мәселе. Бүгінде шойын жолдың 11 мың шақырымы жөнделіп жатыр. Сондай-ақ биыл 100 теміржол вокзалы жөнделіп бітпек. Осы жобаларға құйылатын инвестициялық қаржы жолаушылар қалтасынан емес, жүк жіберетін және тасымалдайтын компаниялар есебінен қайтарылады.

Авторлары: Бақыт Топтаева, Ақылбек Есімсейіт