АҚШ президенті Дональд Трамп еуропалық көшбасшылармен ортақ кездесу өткізуден бас тартып, Украина президенті Владимир Зеленскийді жеке қабылдамақ, — деп хабарлайды Massaget.kz тілшісі Bild басылымына сілтеме жасап.

Трамп шешіміне сәйкес, украин көшбасшысын Вашингтонға Германия канцлері Фридрих Мерц, Еуропалық комиссия төрағасы Урсула фон дер Ляйен және басқа да еуропалық саясаткерлер ертіп барғанына қарамастан, ол алдымен Зеленскиймен жеке сөйлеседі.

Bild деректеріне сүйенсек, Украина мен АҚШ президенттерінің бетпе-бет кездесуінен кейін ғана ЕО мен НАТО өкілдері оларға қосылады. Одан соң кеңейтілген құрамда бірлескен жұмыс кешкі ас пен талқылау жоспарланған.

Кейінгі рет Зеленский мен Трамптың Ақ үйдегі кездесуі жанжалмен аяқталған болатын. Сол жиыннан кейін АҚШ президенті тіпті Киевке әскери көмекті уақытша тоқтатқан еді.

Бұл жолы делегация құрамында Мерц пен фон дер Ляйеннен бөлек, Франция президенті Эмманюэль Макрон, Ұлыбритания премьер-министрі Кир Стармер, Италия премьер-министрі Джорджа Мелони, Финляндия президенті Александр Стубб және НАТО бас хатшысы Марк Рютте бар.

Трамп келесі аптаның аяғына дейін Зеленский және Ресей президенті Владимир Путинмен үшжақты келіссөз өткізуді жоспарлап отырғанын мәлімдеді.

Еске салайық, Зеленский мен Трамптың алғашқы кездесуі 28 ақпанда Ақ үйде өткен еді. Әңгіме барысында Украина президенті АҚШ вице-президенті Джей Ди Венспен, кейін Трамптың өзімен ашық жанжалға барған болатын.

Аптаның басты оқиғалары мен пайдалы видеоларды көру үшін YouTube арнамызға жазылыңыз