
Жамбыл облысында кәмелетке толмаған үш баланы құлдықта ұстаған күдікті қамауға алынды, деп хабарлайды Skifnews.kz ақпарат порталы.
Талас аудандық соты Ұзақбай Тұрбаевты екі ай мерзімге қамауға алу туралы шешім шығарды. Қылмыстық істі облыстық полиция департаменті тергеп жатыр.
Күдікті ұсталғаннан кейін әлеуметтік желіде оның кәмелетке толмаған әйелі бар деген ақпарат тарады. «Письма президенту» Telegram-арнасы бұл деректі растайтын WhatsApp хабарламаларының скриндерін жариялаған. Онда ер адамның екі әйелі бар екені, олардың бірі – балалардың анасы, ал екіншісі – кәмелетке толмаған әрі жүкті қыз екені жазылған. Сондай-ақ күдікті жасөспірім қыздың шашын қырып, орамал тағуға мәжбүрлегені, ал бұл жағдайды түсіндіру үшін «шашы биттеп кеткен» деп айтуға бұйырғаны мәлім болды.
Алайда облыстық полиция департаменті күдіктінің кәмелетке толмаған әйелі бар екені жөнінде ресми ақпарат түспегенін мәлімдеді.
Ведомство мәліметінше, балаларды құлдықта ұстау дерегі бойынша Қылмыстық кодекстің 110-бабының 2-бөлігі («Қинау») бойынша сотқа дейінгі тергеу жүргізілуде. Кәмелетке толмағандар Тараздағы Өмірлік қиын жағдайдағы балаларды қолдау орталығына орналастырылып, оларға психологиялық және құқықтық көмек көрсетілуде. Қылмыстық іс Ішкі істер министрі Ержан Сәденовтің жеке бақылауында. Тергеу мүддесіне байланысты өзге ақпарат жарияланбайды.