АҚШ пен Ресей президенттері Дональд Трамп пен Владимир Путиннің Аляскада кездесуі, сондай-ақ БАҚ-та айтылған "Донецк облысын Мәскеумен бітімге айырбастау" туралы ұсыныстар — Украина мен Еуропа үшін қауіпті жағдай. CNN телеарнасының мәліметінше, олар бұл жағдайда жеңіліп, бейбітшілік кепілдігін алмайды, — деп хабарлайды Massaget .kz тілшісі УНИАН-ға сілтеме жасап.

"Киев пен оның еуропалық одақтастары Трамптың өкілі Стив Уиткоффтың "Украина Донецк пен Луганск облыстарының қалған бөлігін атысты тоқтатуға айырбастайды" деген бастапқы идеясына қорқынышпен қарады", — деп жазады мақала авторы.

Телеарна мәліметінше, Кремль үшін украин жерін соғыссыз алу өте тартымды идея, ал бұл аймақтарды қорғау үшін украиндар мыңдаған адамнан айырылды. Автордың ойынша, теориялық тұрғыда Киев қоршауда қалу қаупі бар Покровск пен Константиновканы бере алар еді. Бірақ Краматорск пен Славянск мүлдем басқа мәселе.

"Қазір бұл қалаларда мыңдаған бейбіт тұрғын өмір сүреді, ал қалалар эвакуацияланып, Ресей әскерінің оқ атпай-ақ кіруі Мәскеуді қатты қуантары анық", — деп жазады CNN.

Бұл аумақтардан бас тарту украиндардың, әсіресе Ресейге мүлдем сенбейтін әскери қызметкерлердің ашу-ызасын тудыратыны сөзсіз. Ал Украина мұның орнына не алатыны белгісіз. Америкалық журналистердің болжамынша, әңгіме Сум мен Харьков облыстарындағы шекара маңындағы шағын аумақтардан Ресей әскерін шығару туралы болуы мүмкін. Бұли- Путиннің "буферлік аймағы" деп аталған жерлер.

Егер Донбасты тек атысты тоқтату үшін беру керек болса, бұл өте күмәнді қадам болмақ. CNN Путин бұрын да өз уәделерін сан мәрте бұзғанын еске салды.

Осы тұрғыда Трамп пен Путиннің Аляскадағы кездесуі Украина үшін тағы бір қауіп көзі ретінде бағаланады. Мақала авторының айтуынша, "Трамп пен Путин арасында достық атмосфера орнап, олар Украина не беруге тиіс екенін өзара шешіп алуы мүмкін". Содан кейін бұл жалған бейбіт жоспар Киевке әскери көмекті тоқтату қаупімен ұсынылуы ықтимал.

Жалпы, жағдай Украина үшін қорқынышты секілді: Трамптың Ресейге жаңа санкция енгізбеген кезекті ультиматумы аяқталды, ресейлік әскер майданда ілгерілеп жатыр, ал Путин украин жерін соғыссыз басып алу мүмкіндігін талқылау үшін көп жылдан кейін алғаш рет АҚШ-қа шақыру алды.

"Бұл — Путин Трампқа өз "сиқырын" қолдана бастағанға дейінгі жағдай ғана. Жұмаға дейін (Аляскадағы кездесу күні) алты күн қалды, бірақ қазірден бастап Киев баяу жеңіліп бара жатқан секілді", — деп түйіндейді автор.

Бұған дейін Трамп Украина мен Ресей арасындағы бейбіт келісім белгілі бір аумақтарды айырбастауды көздейтінін, оған Киев келісуі керек болатынын айтқан. Бірақ ол нақты егжей-тегжейін ашпады.

Батыс БАҚ-тары дереккөздерге сілтеме жасап, АҚШ Путинге Донбастың қалған бөлігін соғысты тоқтатуға айырбастауды ұсынғанын жазды.

Украина президенті Владимир Зеленский болса, Киев өз жерін ресейліктерге "сыйламайтынын" қадап айтты.

Instagram парақшамызға жазылып, ең қызықты ақпараттарды бірінші болып оқыңыз!