Келер жылы коммуналдық қызметтер тарифі 20-30%-ке дейін өседі. Бұл туралы Үкіметте өткен брифингте Табиғи монополияларды реттеу комитетінің төрағасы Тимур Қосымбаев мәлімдеді.

Ал коммуналдық қызметер құнына қосылатын қаражаттың бір бөлігін мемлекет субсидиялайды. Сондай-ақ Ұлттық жоба аясында тозығы жеткен жылу және электр желілері жаңартылады.

Энергетика және коммуналдық секторларды жаңғырту туралы Ұлттық жобаны 5 жылда іске асыруға 13 трлн теңгеден астам инвестиция қажет. Коммуналдық шаруашылықтағы жобаларды қаржыландыруға екінші деңгейлі банктер, «Бәйтерек» және Қазақстан даму банкі тартылмақ. Бірақ жаңа желілермен бірге жаңа тарифтер де келеді. Модернизациялау ықпалынан келер жылы коммуналдық қызмет ақысы 20-30% аралығында өседі. Бірақ халықтың қалтасына ауыр тимеу үшін осы тарифке қосылатын соманың бір бөлігін мемлекет субсидиялайтын болды. Ақшаны республикалық бюджеттен бөледі.

Қанат Бозымбаев, ҚР Премьер-министрінің орынбасары:

- Қазіргі система басқаша «Тариф в обмен на инвестиции». Қазіргі таңда нарықта теңгемен ставкасы 20%. Оны 20% тарифке сала алмаймыз ғой, бірден тариф өседі. Оны 10%-ке түсіретін субсидиялау жүйесін қарап шықтық, көрдік, бекіттік. Бірінші кезеңде осы субсидиялау республикалық бюджеттен болады. Бірақ заңды түрде осындай мүмкіндік болады Ұлттық қордан алуға. Бірақ бюджетпен шығамыз деп үміттеніп отырмыз.

Мемлекет су үнемдеу технологиясына көшкендерді қолдайды

Үкіметте өткен брифингте сумен жабдықтау мәселесі де жіті талқыланды. Жыл соңына дейін алты облыста 10 су құбырының құрылысы мен жөндеу жұмыстары аяқталады. Сондай-ақ 105 гидроқондырғы тексеріледі. Вице-премьердің айтуынша, алдағы екі жылда су үнемдеу технологияларын қолданатын фермерлер көбейіп, шаруашылық жер ауданы 912 мың гектарға дейін ұлғаяды. Мемлекет су үнемдеу жүйесіне көшкендерді қолдап, төленетін өтемақысын 80%-ке арттырды.

Нұржан Нұржігітов, ҚР Су ресурстары және ирригация министрі:

- Орталық Азиядағы климаттың жағдайына байланысты температураның көтерілгеніне байланысты, содан кейін осы Оңтүстік Қазақстанда және орталық Азияда жаңбыр-шашынның 60%-тен төмен болғанына байланысты. Вегетация бүгінгі күні мен айтқан факторларға байланысты күрделі өтіп жатыр, бірақ ол тұрақты түрде. 80%-тен астам суды біз қазір шаруаларға бердік, осы тамыз айында біз жұмысты аяқтаймыз.

Қысқа дайындық: 30 қазандық жөнделіп жатыр

Жиында алдағы қысқа дайындық та пысықталды. Энергетика вице-минисрті Сұңғат Есімхановтың айтуынша, бәрі кестеге сай жүріп жатыр. Оңтүстікте жылыту маусымы кешірек басталатындықтан, жөндеу жұмыстары қазанда аяқталады. Ал солтүстікте қыс ерте түсетіндіктен, бәрі уақытылы бітеді. Қыс алдында, әсіресе, мектептер мен балабақшалар және басқа да әлеуметтік нысандардың дайындығы тексеріледі.

Авторлары: Ғазиза Мұхамеджанова, Марат Диханбаев