Құжаттарға екі елдің ветеринариялық қызметтері арасындағы екіжақты келіссөздер аясында қол қойылды.

ҚР Ауыл шаруашылығы министрлігінің ветеринариялық бақылау және қадағалау комитеті Қазақстаннан союға арналған ірі қара мен ұсақ малды экспорттауға қатысты ветеринариялық сертификаттардың формалары Ирак Республикасының ветеринариялық қызметімен келісіп, бекітті, деп жазады inbusiness.kz сайты.

"Бұл келісімдер қазақстандық өндірушілер үшін жаңа экспорттық бағыт ашып, ауыл шаруашылығы өнімдері жеткізілімі географиясын кеңейтті және Таяу Шығыс өңірімен сыртқы экономикалық ынтымақтастықты нығайтты. Ветеринариялық талаптардың келісіліп, бекітілуі Қазақстанның ветеринариялық бақылау жүйесіне деген жоғары сенімді білдіреді және отандық мал шаруашылығының экспорттық әлеуетін арттырудағы маңызды қадам. Ирак қазақстандық өнім үшін жаңа нарыққа айналды", – делінген ауыл шаруашылығы министрлігі таратқан ақпаратта.

Комитет отандық экспорттаушылардың сұрауларына сәйкес басқа елдермен ветеринариялық-санитариялық талаптарды келісу жұмысын жалғастыруда және өнімді шетелдік нарықтарға шығаруға жан-жақты қолдау көрсетеді.