Қазақстандықтар ет пен ет өнімдерін көбірек жейтін болған. Бұл туралы EnergyProm сарапшылары мәлімдеді, — деп хабарлайды Massaget.kz тілшісі.

EnergyProm ақпараты бойынша биыл бірінші тоқсанда қазақстандықтар арасында ет пен ет өнімдерін тұтыну көлемі бір адамға орта есеппен 20,6 келіге жеткен. Бұл былтырмен салыстырғанда 1,7 пайызға көп.

Өңірлер бойынша

Ақмола (бір адамға 24,1 келіден), Жамбыл (23,9 келіден) және Маңғыстау (23,6 келіден) облыстарының тұрғындары етті көбірек жеген. Ал Қызылорда облысында (15,8 келіден), Шымкентте (16,3 келіден) және Түркістан облысында (16,9 келіден) ең аз көрсеткіш тіркелген.

Ет және ет өнімдеріне сұраныс

Сиыр етіне ең көп сұраныс байқалған, бір адамға 6,1 келіден келеді. Алайда оны тұтыну көлемі бұл кезеңде 3 пайызға төмендеген. Сондай-ақ, қой еті көп желінбеген, көлемі 1 пайызға, 1,2 келіге дейін төмендеген.

Есесіне қазақстандықтар жылқы (өсім 4,1 пайызға, 2,1 келіге дейін) және тауық етін (5,6 пайызға, 1,4 келіге дейін) көп сатып ала бастаған.

Қазақстандықтар ет сатып алуға қанша жұмсаған?

2025 жылғы бірінші тоқсанда отбасылардың ет пен ет өнімдеріне жұмсаған орташа шығыны 157,9 мың теңгеге жеткен, бұл көрсеткіш былтырмен салыстырғанда 9,5 пайызға артық.

Ет өнімдеріне ең көп шығынды Маңғыстау облысының тұрғындары жұмсаған: бір отбасы орта есеппен 233,5 мың теңге төлеген. Бұл былтырға қарағанда 2 пайызға аз (238,2 мың теңге), алайда елдегі орташа көрсеткіштен 47,9 пайызға артық.

Көшбасшылар үштігіне Жамбыл облысы (222 мың теңге) және Атырау облысы (219,3 мың теңге) кіреді.

Солтүстік Қазақстан облысындағы отбасылар ет пен ет өнімдеріне ең аз ақша жұмсаған: 92,7 мың теңге. Одан кейін Қостанай облысы (101,3 мың теңге) және Ақмола облысы (121,7 мың теңге) тұр.

Ет бағасы қаншадан болып жатыр?

Ұлттық статистика бюросының дерегіне сүйенсек, маусымда Қазақстанда ет және ет өнімдері бір айда 1,2 пайызға және бір жылда 11,3 пайызға қымбаттаған.

Қызықты жаңалықтар мен видеоларды көру үшін TikTok арнамызға жазылыңыз!