Қостанай облысында «Келешек мектептері» ұлттық жобасы аясында төрт мектеп қолданысқа берілді.

Заманауи білім ошақтарында жұмыс істейтін педагогтар құрамы конкурстық негізде іріктелді. Осы ретте 200-ден астам мұғалім біліктілікті арттыру курсынан өтті.

Қостанайда бұл 900 орындық мектептің ашылғанына жарты жыл өтті. Заманауи білім ұясында жазғы каникул кезінде оқу процесі үзілмеген. Қазір мұнда балалардың шығармашылығын дамытатын 13 үйірме жұмыс істейді.

Ұлан Сералин, оқушы:

– Біздің мектепте осы жазғы уақытта экология кружогы бар. Соған келіп жүрмін. Мектептің іші оқуға және білім алуға өте ыңғайлы. Жаңа заттармен қамтамасыз етілген. Бұл білім алуға, уақыт өткізуге өте ыңғайлы.

Гүлсара Құсайынова, қала тұрғыны:

– Осы мектепте менің екі балам сабақ оиды. Қызым 4-сыныпта, ұлым 5-сыныпта. Ата-ана ретінде балаларым осындай заманауи келешек мектепте білім алып жатқанына қуаныштымын. Себебі сапалы білім алуға бұл мектепте барлық жағдай жасалған. Мысалға кең сыныптар, жабдықталған кабинеттер.

Өткен оқу жылының қорытындысы бойынша балалардың екінші жартыжылдықта білім сапасы 7 процентке артқаны байқалды. Мектеп директоры бұны педагогтардың кәсіби біліктілігі мен оқу ордасының материалдық жабдықталуының нәтижесімен байланыстырады. Мұғалімдер келешек мектептеріне ұлттық білім беру базасының электронды іріктеуі арқылы қабылданған.

Жұмабике Мейрамова, мектеп директоры:

– Мұғалімдерді жұмысқа қабылдау конкурс тәртібімен өткізіледі. Яғни НОБД платформасы арқылы мұғалімдерді конкурс негізінде қабылдаймыз. Бұл ашықтық және мұғалімдердің конкурсқа қатысқан кезінде мектеп таңдау жасамайды, жаңағы платформа арқылы кім көп балл жинаса сол мұғалім жұмысқа орналасуға мүмкіндік алады.

Мектептегі сыныптар түгелдей соңғы үлгідегі жиһаз және құралдармен жабдықталған. STEM-зертхана, робототехника мен нанотехнология кабинеттері бар.

Гүлнәр Әбдіғапарова, мектеп директорының орынбасары:

– Келешек мектеп бұл жай ғана оқу орыны емес. Оқушының қызығушылығын, қабілетін ерте танып, оның әлеуетін ашуға мүмкіндік жасайтын даму ортасы. Елдің ертеңі осы жас ұрпақтың қолында. Сондықтан болашақққа салынған нақты инвестиция деп айтуға болады.

Жалпы өңірде «Келешек мектептері» ұлттық жобасы аясында 4 мектеп салынды. Тағы екеуінің құрылысы жақында аяқталады. Заманауи мектептерде шамамен төрт жарым мың оқушы білім алады.

Елдос Кәкенов, Наталья Строкова, Ермек Мухамедьяров