Қызметтің ақысы төленгенімен, жұмыс атқарылмаған .

Павлодар облыстық прокуратура өкілдері кезекті тексеріс барысында бірнеше былықтың бетін ашты, деп хабарлайды inbusiness.kz тілшісі.

Белгілі болғандай, ақпараттандыруды дамытудың өңірлік орталығында жүргізілген тексеріс қорытындысы қолға алынбаған, мүлде атқарылмаған жұмыс үшін қызмет көрсетушілерге бюджеттен қомақты сома төлеген.

Атап айтқанда, 110 млн теңге заңсыз аударылған. Ал сайып келгенде ауылдық аймақтарда қоғамдық интернет тек қағаз жүзінде қосылған болып шықты. Жер және сәулет саласындағы процесттерді цифрландыру да іске аспағаны анықталды.

Ал Ақсу қаласында әлеуметтік тұрғын үйді салу барысында іске аспаған жұмыс пен жеткізілмеген тауар үшін мердігерге 450 млн теңге төленген. Бұл қылмыстық әрекеттің салдарынан баспана құрылысы "сақалды" құрылысқа айналды.

Прокуратура өкілдері мәлімдегендей, осылайша ел қазынасына жарты миллиард теңгеден астам шығын келтірілді. Мемлекеттің мүддесіне қарсы бұл қылмыстар бойынша арнайы прокурорлар тергеу жұмыстарын жүргізуде.