Қауіп күшейіп тұрған Пафос ауданында және басқа аймақтарда жағдай тұрақсыз.

Кипрде соңғы 50 жылда болмаған ауқымды орман өрті өршіп тұр. Екі күн бұрын басталған өрт кемінде 120 шаршы шақырым аумақты шарпыған, деп жазады inbusiness.kz сайты.

Бұл – аралдың жалпы жер көлемінің 1%-дан астамы.

Өрт 23 шілдеде басталып, аптап ыстық пен екпінді жел салдарынан тез таралған. Соның кесірінен 14 ауылдың тұрғындары шұғыл эвакуацияланып, Лофу ауылында кемінде 20 үй жойылған.

Төтенше жағдай салдарынан он адам зардап шекті. Олардың ішінде екі адамның мәйіті өртенген көліктің ішінен табылды. Тағы екі адам ауыр күйікпен ауруханаға жеткізілген. Қазіргі жағдайлары ауыр деп бағалануда.

Кипр билігі 24 шілде күні таңертең негізгі өрт ошақтарын ауыздықтағанын мәлімдегенімен, кейін кейбір аймақтарда от қайта тұтанды. Құтқару және өрт сөндіру жұмыстарына 250-ден астам маман мен 18 әуе көлігі жұмылдырылған.

Кипр үкіметі шетелдік көмек сұраған. Нәтижесінде Испания екі өрт сөндіру ұшағын, Иордания екі тікұшақ, Ұлыбритания әскери ұшақ, ал Израиль арнайы әуе техникасын жіберетінін мәлімдеді.

Мамандар күннің аптап ыстыққа ұласатынын және желдің қайта өршитінін ескертіп отыр. Бірқатар жолдар жабық, төтенше жағдай режимі сақталуда.

Еске сала кетейік, Кипрдегі бұған дейінгі ең ірі өрт 1974 жылы Түркияның аралға әскери басып кіруі кезінде тіркелген. Ол кезде 260 шаршы шақырым аумақ өртенген болатын.