Елімізде вейп және басқа никотин құрамдас бұйымдарға қарсы күрес шаралары күшейтілді

Бұл туралы Caravan.kz медиа порталы kaz.inform.kz-ке сілтеме жасап хабарлайды.

Президент 2024 жылғы 19 сәуірде қол қойған Заңға сәйкес, 20 маусымнан бастап электронды темекілерді, хош иістендіргіштерді және басқа да осыған ұқсас тауарларды әкелуге, өндіруге және сатуға толық тыйым салынды.

Қандай тыйым салынды?

Қазақстан Республикасының «Халық денсаулығы және денсаулық сақтау жүйесі туралы» Кодексінің 110-бабына енгізілген жаңартуларға сәйкес, тыйым салынады:

• шекпейтін темекі өнімдері;
• электронды тұтыну жүйелері (вейп);
• вейпке арналған хош иістер ен сұйықтықтар;
• никотин мен шайыр мөлшері рұқсат етілген нормадан асатын темекі өнімдері мен кальян қоспалары;
• санитарлық талаптарға сай келмейтін бұйымдар.

Қандай жаза қарастырылған?

Қылмыстық кодекске де өзгерістер енгізіліп, 301-1-баппен жаңа жауапкершілік белгіленді.

Тыйым салынған өнімдерді сатқаны және таратқаны үшін:

• 200 АЕК-ке дейін айыппұл;
• немесе 200 сағатқа дейін түзету немесе қоғамдық жұмыс;
• немесе 50 тәулікке дейін қамауға алу.

Өндіру және әкелу үшін:

• 2000 АЕК-ке дейін айыппұл;
• не 2 жылға дейін бас бостандығынан айыру, мүлікті тәркілеу.

Жазаны ауырлататын жағдай:

Егер бұл құқық бұзушылықтар қайталанса немесе топпен жасалса, жаза 5 жылға дейін бас бостандығынан айыруға дейін күшейтіледі.