Қоғамдық көлік қозғалысын жаңғырту оның жылдамдығын 20 пайызға арттыруға мүмкіндік береді.

Үкімет басшысы Олжас Бектенов Астана қаласындағы көлік кептелісімен күреске қатысты мәжіліс депуатттарының сауалына жауап берді.

Премьердің айтуынша, бас қалада бұл ретте негізгі үш бағыттағы жұмыстар қолға алынған.

Оның біріншісі – биыл ғана жүзеге асырылып бастаған Жол қозғалысын ұйымдастыру орталығының жұмысы. Қазіргі уақытта орталықты қажетті жабдықтармен қамтамасыз ету және бейінді мамандарды даярлау мәселелері шешіліп жатыр.

Екінші бағыт – жоғары жылдамдықты қоғамдық көлік жүйесін дамыту.

"Осы бағыт аясында 2025-2026 жылдары 7 көшені қайта құру жұмыстары басталды. Оған қоса, қоғамдық көлік паркі белсенді жаңғыртылып жатыр. 2024 жылы 305 автобус сатып алынса, 2025 жылы тағы 300 автобус алу жоспарланған. Бұл бастамалар қоғамдық көліктің қозғалыс жылдамдығын 20%-ға арттыруға мүмкіндік береді", – делінген Олжас Бектеновтің жауабында.

Сондай-ақ, үкімет пен қала билігі жасанды интеллектіні пайдалана отырып, электронды көлік моделін әзірлеуге басымдық беріп отыр. Бүгінгі таңда қала көшелеріне күн сайын шамамен 550-600 мың автокөлік шығады.

"Көлік ағындарының ең жоғары тығыздығы Мәңгілік Ел, Қабанбай батыр мен Тұран даңғылдары, Сарайшык пен Қонаев көшелерінде тіркеледі. Қазіргі кезде Астана қаласының Есіл ауданы бойынша көлік кептелісі мәселесін кешенді шешуге қажетті бастапқы деректер жиналуда. Астана қаласының электронды көлік моделі үлкен деректерді талдау және көлік ағындарын болжау арқылы қабылданатын көлік шешімдерінің негізділігін арттырады. Жүйенің әзірлемесін биылғы жыл соңына дейін аяқтау жоспарланған", – деді премьер-министр.

Оқи отырыңыз:

• Тоқаев Астананы дамытуға бағытталған заңға қол қойды
• "Астана–Бурабай" бағытында жаңа электр пойызы іске қосылды