Бүгінгі жеңісінің арқасында дүйсенбі күні Александр Бублик әлемнің 30-ракеткасы атанады.

Әлемнің 34-ракеткасы Александр Бублик Швейцарияның Гштаад қаласында өтіп жатқан ATP 250 санатындағы турнирдің финалына жолдама алды.

Жартылай финалда қазақстандық теннисші Франция өкілі Артур Казоны (АТР №116) 6:1, 7:5 есебімен айқын басымдықпен жеңді. Кездесу 1 сағат 13 минутқа созылды. Осы уақыт ішінде Бублик 11 эйс жасап, 3 қос қателікке жол берді және 8 брейк-пойнттың үшеуін сәтті жүзеге асырды.

Финалда ол әлемдік рейтингте 109-орында тұрған аргентиналық Хуан-Мануэль Серундоломен күш сынасады.

Айта кету керек, Серундоло соңғы кездері бабында. Бұл оның қатарынан екінші финалы болмақ.

Гштаадтағы финалға шыққаны үшін Бублик 52 890 еуро сыйақы мен 165 рейтингтік ұпайды иеленіп отыр. Бұл нәтиже оған дүйсенбі күні қайтадан әлемнің үздік 30 теннисшісінің қатарына оралуға мүмкіндік береді.