Қазақстанда жұмысшы мамандарға сұраныс 40 пайыздан асты. Сол себепті жас әрі білікті кадрлар даярлауға ерекше назар аудару қажет. Қарағанды облысында тұрғындармен кездескен Мәжіліс төрағасы осылай деді.

Делегация алдымен Нұра ауданындағы Болат Әбдікәрімов атындағы көпсалалы колледжге барды. Бұнда агроөнеркәсіп, құрылыс және өндіріс салалары бойынша 10 кәсіп оқытылады. 300 студент білім алып жатыр. Мәжіліс спикері Ерлан Қошанов Жұмысшы мамандықтар жылында колледждер мен училищелер елге қажетті мамандар даярлау ісіне ден қойғанын жеткізді. Сондай-ақ жұмысшы мамандық иелері үшін жаңадан тұрғын үй ипотекалық бағдарламасы іске қосылғанын және зиянды еңбек жағдайында жұмыс істейтіндерге зейнетке ерте шығу мүмкіндігі қарастырылғанын атап өтті.

Ауданда ауыл шаруашылығы да қарқынды дамып келеді. Мәжіліс депутаттары биыл іске қосылған сүт фермасының жұмысымен танысты. Кәсіпорын 1100 голштин-фриз тұқымды сауын сиыр ұстайды. Ферма тәулігіне орта есеппен 27 тонна, жылына 10 мың тоннаға дейін сүт өндіруді жоспарлап отыр. Бұдан соң депутаттар медицина қызметкерлеріне арналған көппәтерлі тұрғын үй кешенінің күрделі жөндеу жұмыстарын да тексерді. Жыл соңына дейін жаңа қызметтік баспанаға аудандық аурухананың жас қызметкерлерінен 14 отбасы қоныстанады.