16–27 шілде аралығында Германияның Рейн-Рур өңірінде XXXII жазғы Бүкіләлемдік Универсиада өтеді.

Халықаралық студенттік жарыстарға Қазақстан атынан 12 спорт түрі бойынша 76 спортшы қатысады. Сонымен қатар ұлттық құраманың сапына 18 жаттықтырушы мен 6 ресми өкіл енген.

ҚР Ғылым және жоғары білім министрлігі мәлім еткендей, турнир Германияның бірнеше қаласында — Дуйсбург, Бохум, Эссен, Хаген, Мюльхайм, сондай-ақ ел астанасы Берлинде өтеді. Жарыстың ұйымдастырушысы – Халықаралық студенттік спорт федерациясы (FISU).

XXXII Универсиадаға әлемнің түкпір-түкпірінен 8,5 мыңнан астам спортшы қатысады. Жарыс бағдарламасында 18 спорт түрі бойынша 234 медаль жиынтығы сарапқа салынады. Олардың қатарында жеңіл атлетика, жүзу, семсерлесу, гимнастика, таэквондо, садақ ату, нысана көздеу және басқа да спорт түрлері бар.

Қазақстан бұл беделді студенттік жарысқа 1993 жылдан бері тұрақты негізде қатысып келеді. Осы уақыт аралығында отандық спортшылар Универсиадада бірнеше мәрте жүлдегер атанып, еліміздің намысын лайықты қорғап жүр.

2023 жылы Қытайдың Чэнду қаласында өткен XXXI жазғы Универсиадада Қазақстан құрамасы 20 медаль жеңіп алды: 2 алтын, 7 күміс және 11 қола.

Қазақстандық делегацияның Универсиада тарихындағы ең жоғары нәтижесі 2013 жылы Қазан қаласында өткен жарыста тіркелді — сол жолы ұлттық құрама 30 жүлде жеңіп алған болатын.