Оқыс оқиға Байзақов және Бұқар жырау көшелерінің қиылысында болған.

Әлеуметтік желілерде жарылыстан аударылып қалған жеңіл көліктің бейнежазбасы тарады, деп хабарлайды inbusiness.kz сайты.

"QazaqGaz Aimaq" АҚ мәліметінше, "СантехКомплектГрупп" мердігер ұйымы орташа қысымды жаңадан салынған жерасты газ құбырына қысым беру жұмыстарын жүргізгенде ауа қоспасы шығып, жарылыс туындаған. Оқиға салдарынан жол жабыны, ағаш және бір автокөлік зақымданған.

– Оқиға орнына қаланың барлық тиісті апаттық қызметі жедел жетті. Қазіргі уақытта аталған аумақта тексеру жұмыстары жүргізіліп, болған оқиғаның себептері анықталып жатыр. Оқиға аумағы қоршалды, халыққа ешқандай қауіп төніп тұрған жоқ. Қаза тапқандар жоқ, – деп хабарлады "QazaqGaz Aimaq" АҚ.​

Ал, Алматы қаласы Қоғамдық денсаулық сақтау басқармасының баспасөз қызметі көлікте зардап шеккен екі адамның Орталық қалалық клиникалық ауруханаға жеткізілгенін хабарлады.

"Қажетті тексерулер жүргізілгеннен кейін 2 адамға жұмсақ тіндерінің көгеруі диагнозы қойылды. Олардың жағдайы тұрақты, ауруханаға жатқызуды қажет етпейді. Тексеруден кейін амбулаториялық ем алуға жіберілді", – делінген басқарма таратқан хабарламада.