Перизат Қайраттың ісі бойынша сотта куәгер Ләйлә Троицкая 2024 жылдың қаңтарында оған өзінің Rebel Flowers гүл бизнесін 23 млн теңгеге сатқанын айтып берді, деп хабарлайды Skifnews.kz ақпарат порталы.

«Мен өзім үшін Rebel Flowers-тен шығу туралы шешім қабылдадым. 2023 жылдың желтоқсанында бір танысым хабарласып, «сатып алушылар бар» деді. Бір әйел қоңырау шалып, өзін Гайни деп таныстырды. Кейін кездесуге Перизат та келді. «Қызым үшін сыйлық жасағым келеді» деді».

Троицкаяның айтуынша, келісім сенімге негізделген:

«10 қаңтарда келісімшартқа қол қойдық. Перизат 2 млн теңгені қолма-қол берді, кейін тағы бір бөлігін төледі. 11 млн теңгені 23 қаңтарда аударды. Мен ТОО-ны оның атына рәсімдеп, құжаттарды бердім».

Куәгер Перизаттың белсенділігін атап өтті:

«Мен сырттай бақыладым. Ол қалайша гүлді ірі көлемде сатып алып жатқанын көріп, таңғалдым. Қорықпайтын. Кейін бір нүктеден шығып кетті — оған орын аз болып қалды. Ол маған Дубайда ет бизнесімен айналысатынын да айтқан еді».