Бұл жөнінде Ақорданың баспасөз қызметі хабарлады. Заң мәтіні баспасөзде жарияланатын болады.

Мемлекет басшысы міндетті әлеуметтік медициналық сақтандыру (МӘМС) және медициналық қызмет көрсетуге қатысты бірқатар заңнамалық актілерге өзгерістер мен толықтырулар енгізу туралы заңға қол қойды, деп жазады inbusiness.kz сайты.

Айта кетейік, 2023 жылмен салыстырғанда 2024 жылы МӘМС аясында көрсетілген медициналық көмектің көлемі 12%-ға артып, 1,1 трлн теңгені құрады.

Жаңа нормалар 2026 жылғы 1 қаңтардан бастап қолданысқа енеді. Мәжіліс пен Сенат мақұлдаған заң жобасы Мемлекет басшысына жолданып, бүгінде қол қойылды.

Денсаулық сақтау министрі Ақмарал Әлназарованың айтуынша, заң аясында ең басты өзгерістердің бірі – МӘМС пен кепілдендірілген тегін медициналық көмек (ТМККК) аясындағы қызметтердің нақты ажыратылуы.

– Бұл қадам емханаларға қаржы мен пациент ағынын тиімді басқаруға, медициналық қызмет көрсету жүйесінің ашықтығын арттыруға мүмкіндік береді, – деді министр.

Тағы бір маңызды жаңалық – онкологиялық скрининг МӘМС пакетінен ТМККК қатарына ауыстырылды. Бұл жаңалық халықтың онкологиялық ауруларды ерте анықтау қызметіне кеңінен қол жеткізуін қамтамасыз етеді.