Перизат Қайрат ісі бойынша сот отырысы кезінде судья Сабыржан Кәрімов айыпталушыға ескерту жасады, — деп хабарлайды Massaget.kz тілшісі.

Бүгін сотта "Жас Отан" жастар қанатының бұрынғы волонтёрі Сергей Матюшенко куәлік берді. Ол BizBirgemiz қоғамдық бірлестігі құрылтай жиналысының қатысушыларының бірі ретінде көрсетілген.

Прокурорлар мен судьяның сұрақтарына жауап бергеннен кейін, айыпталушы Перизат Қайрат куәге сұрақ қойды. Ол Матюшенкодан BizBirgemiz қоғамдық бірлестігі құрылтай жиналысының №1 хаттамасына қол қоймағаны рас па деп сұрады. Бұған дейінгі жауаптарында Матюшенко тек бір ғана хаттамаға қол қойғанын, екіншісіне қол қоймағанын айтқан болатын.

Сот процесі барысында келесі диалог өрбіді:

Перизат Қайрат: Сергей, сәлеметсіз бе. Сіз қазір екінші хаттамаға шынымен де қол қоймағаныңызды растайсыз ба?

Сергей Матюшенко: Иә, растаймын, екінші хаттамаға мен қол қойған жоқпын.

Перизат Қайрат: Өтірік айтып тұрған жоқсың ба?

Сергей Матюшенко: Жоқ, мен өтірік айтып тұрған жоқпын.

Перизат Қайрат: Қазір менің тағдырым шешіліп жатқанын түсініп тұрсың ба?

Сергей Матюшенко: Перизат, мен екінші хаттаманы өз көзіммен көрдім. Онда менің қолым емес.

Айыпталушы Қайрат куәге бірнеше рет бір сұрақты қайталап қойды. Осы кезде судья Сабыржан Кәрімов оған ескерту жасады:

"Айыпталушы Қайрат, мен тағы да қайталаймын: куәгерге өз ойыңызды таңып тұрсыз. Сізден өтініш енді қысым көрсетпеңіз. Егер сұрақтарыңызды қайталай беретін болсаңыз, сот оларды алып тастайды," – деді судья.

Перизат Қайрат пен Сергей Матюшенконың диалогы әрі қарай жалғасты. Айыпталушы куәгердің сөзін бірнеше рет бөліп, нақтылау сұрақтарын қойды.

Судья Кәрімов тағы да ескерту жасады:

"Айыпталушы, мен сізге түске дейін екі рет түсіндірдім. Сұрақ қойыңыз, жауапты тыңдаңыз, содан кейін келесі сұрақты қойыңыз. Сіз өзіңізге тиімді жауап алғыңыз келетін сияқты әсер қалдырасыз. Сот отырысының нақты тәртібі бар. Шындықты айтып жатыр ма, жоқ па – оны сот анықтайды. Бұл жерде эмоцияға беріліп, дауыс көтерудің қажеті жоқ", – деді ол.

Перизат Қайрат судьяға дауыс көтермегенін айтып, қарсылық білдірді.

Қызықты жаңалықтар мен видеоларды көру үшін TikTok арнамызға жазылыңыз!