2026 жылы Астанада "Болашақ ойындары" ірі спорттық шара өтеді .

Бұл турнир спорттың физикалық және цифрлық өлшемдерін біріктіреді, деп жазады inbusiness.kz сайты.

– "Болашақ ойындарының" бюджеті мен жүлде қоры 10 миллион долларды құрайды, бұл сома 13 дисциплинаға теңдей бөлінеді. Алайда, прайм-дисциплиналар да бар, яғни олардың бюджеті жоғарырақ болады, ал кейбір дисциплиналарда жүлде қоры сәл төменірек болады, – деді "Қазспортинвест" АҚ президенті Әлібек Хасенов Астанадағы ОКҚ алаңында өткен баспасөз конференциясында.

Оның айтуынша, бұл бюджет пен жүлде қоры демеушілік қаражат есебінен қалыптастырылады. Қазіргі уақытта демеушілерді тарту бойынша белсенді жұмыс жүргізіліп жатыр.

2026 жылдың 18 шілде мен 1 тамыз аралығында Астанада фиджитал-спорттан "Болашақ ойындары" халықаралық мультиспорттық турнирі өтеді. Жарысқа 100-ден астам мемлекеттен 1500-ден астам спортшы қатысады.

Турнирде ұсынылатын дисциплиналар санаттарға бөлінеді: спорт, техника, тактика, батл.

ҚР туризм және спорт вице-министрі Серік Жарасбаевтың айтуынша, жарыс Qazaqstan жеңіл атлетикалық спорт кешені, "Барыс Арена" МА, "Сарыарқа" велотрегі, Ж.Үшкемпіров атындағы жекпе-жек сарайы, "Алау" Мұз сарайы, "Билайн Арена", инклюзивті спорт орталығы, Конгресс-орталық және т. б.сияқты жетекші стадиондарда өтеді.

– Бүгінгі таңда турнирдің дисциплиналары анықталды: Phygital Football, Phygital Fighting, Phygital Basketball, Phygital Dancing, Phygital Hockey, Phygital Shooter, Phygital Battle Royale, MOBA 1 және MOBA 2, Phygital drone Racing. Турнирде ұсынылатын барлық дисциплиналар санаттарға бөлінеді: спорт, техника, тактика, батл", – деді С.Жарасбаев.

Ойындар шеңберінде робототехника, виртуалды және толықтырылған шындық, спорт және білім беру саласындағы жетістіктердің интерактивті көрмесі – "Болашақ қаласы" арнайы жобасын іске асыру жоспарланған.

Айта кетейік, бүгін Үкімет басшысы Олжас Бектенов Phygital International басшысы Рене Фазелмен кездесіп, жарысты ұйымдастыру барысын талқылады.