Еліміздің жоғары оқу орындарына құжат қабылдау басталды. Бұл туралы Ғылым және жоғары білім министрлігі хабарлады. Талапкерлер 20 шілдеге дейін білім беру гранттары конкурсына, сондай-ақ ақылы негізде оқуға өтініш бере алады. Құжаттарды eGov.kz порталы арқылы онлайн немесе университеттер жанындағы қабылдау орталықтары арқылы тапсыруға мүмкіндік берілген.

Ақылы негізде оқуға түсу үшін ҰБТ-дан шекті балл жинау жеткілікті. Алайда жоғары оқу орындары талапкерге қосымша талаптар қоюы мүмкін. Қажетті құжаттар тізімі мен құжат тапсыру мерзімі туралы ақпарат Ғылым және жоғары білім министрлігінің және Ұлттық тестілеу орталығының ресми сайттарында көрсетілген. Ал грант иегерлерінің тізімі 10 тамызға дейін жарияланады.