Шымкент қаласының төтенше жағдайлар қызметінде жұмыс істейтін 10 құтқарушы баспаналы болды. Сондай-ақ төтенше жағдайлар департаментінің автопаркі су жаңа 40 арнайы техникамен толықты. Айта кету керек, тұрғын үйлер мен техникалардың барлығы қала қазынасының қаржысына алынған .

Жаңа техникалардың ішінде өрт сөндіру машиналарынан бөлек, автоцистерна, 25 тоннаға дейін жүк көтеруге қауқарлы кран, жанар-жағар май жеткізіп беретін көлік те бар. Енді құтқарушылар биік ғимаратта тұтанған өртті жылдам ауыздықтай алады. Қаланың көлік нөпірінде де тұрып қалмайды.

Сұлтанбек Жолдас, Төтенше жағдайлар департаментінің бас маманы:

Өрт орын алған кезде 15-этаждан жоғары қабаттағы өрттерге сатымен шығып, төтенше жағдайларды жоюға көп септігін тигізеді. Кептелістен оңай шығады және автокөліктердің көлемі ыңғайлы.

Бүгін құтқарушыларға көлікпен бірге апат орнында ширақ қимылдауға ыңғайлы арнайы киім де берілді. Тағы бір зор қуаныш, 10 маман жаңа пәтерлердің иесі атанды.

Нұрболат Рақым, өрт сөндіруші:

Енді баcпанлы болып, мәселеміз шешілді. Бір арманымыз орындалды.

Үкімет қамқорлығының арқасында енді төтенше жағдайлар қызметі мамандарының да пәтер жалдау ақысы мемлекет есебінен төленетін болды.

Шыңғыс Әрінов, ҚР Төтенше жағдайлар министрі:

Бүгін біз тарихи сәттің куәсіміз. Елімізде алғаш рет Шымкент өңірінің құтқарушылары үшін медициналық емхана мен өрт сынақ зертханасы салынды. Бұл тек ем қабылдайтын орын емес, қызметкерлер мен олардың отбасының әл-ауқатына жасалған қамқорлық.

Бүгінгі таңда Шымкент қаласында 10 өрт сөндіру бөлімі жасақталған. Жергілікті биліктің қолдауымен биыл тағы осындай 5 нысан салынбақ.

Ғани Қалмаханов