Оқу-ағарту министрлігінің мәліметінше, ауыл педагогтері қалалық әріптестеріне қарағанда әлдеқайда жоғары еңбекақы алады .

Қазақстанда мектепке дейінгі ұйымдарда қызмет ететін педагогтердің орташа жалақысы 290 мың теңгеге тең. Бұл ретте ауылдағы орташа көрсеткіш 322 мың теңгеге тең болса, қалада қызмет ететін педагогтер орташа 258 мың теңге жалақы алады. Бұл мәліметтер оқу-ағарту бірінші вице-министрі Майра Мелдебекованың мәжіліс депутаттарына берген жауабында жазылған.

Балабақша қызметкерлерінің жалақысы 2020 жылдан бері 4 жыл қатарынан 25 пайызға артса, 2023 жылы бірден 30 пайызға өскен.

Сондай-ақ, жауапта Қазақстанда қазір 11 854 мектепке дейінгі білім беру ұйымы жұмыс істейтіні айтылса, олардың 5500-ге жуығы мемлекеттік, ал 6300-ден астамы жекеменшік балабақшалар. Оларда 1 миллионнан астам бала білім мен тәрбие алады.

Ал кезекте тұрған балалар саны 100 мыңға жуық. Балабақша жетіспеушілігі, әсіресе, Қызылорда және Қарағанды облыстарында, сонымен қатар Алматы, Астана және Шымкент қалаларында тіркелген. Олардың бәрінде балаларды балабақшамен қамту үлесі 84-89 пайыз аралығында.

"2028 жылға қарай 2-6 жастағы балаларды ата-аналардың сұранысы бойынша мектепке дейінгі ұйыммен толықтай қамту жоспарланып отыр. Бұл ретте есепке жолдама кезегінде тұрған балалардың саны алынады", – делінген Майра Мелдебекованың жауабында.

Оқи отырыңыз:

• Баланы ұратын тәрбиешілерге тоқтам бар ма? Балабақшаларда қашан тәртіп орнайды
• Қызылордада мыңдаған бүлдіршін балабақшасыз қалуы мүмкін