ҚР Сыртқы істер министрлігінің ресми өкілі Айбек Смадияров қазақстандықтардың шетелге жұмысқа кету себебіне тоқталды. Оның айтуынша, көп адам елде жұмыс жоқ деген сылтаумен шетелге кетіп, оңай ақша іздейді, ал шындығында, білім мен тіл білсе, Қазақстанда да жақсы табыс табуға болады, деп хабарлайды Skifnews.kz ақпарат порталы.

«Өткен жылы екі жігіт — екеуі де ағылшынша да, қытайша да біледі. Дубайға жұмыс іздеп барды. Дубайда шетелдіктерге жұмыс көп. Соның өзінде біле тұра, бір Қытайдың компаниясымен Таиландқа ұшып келеді, сосын джунглидің ішімен тағы бір компанияға барып жұмысқа кіреді. Сонда оларды мыңдаған шақырымға алып барады. Сонда да түсінуге болады ғой қайда бара жатқандарын. Біліп тұр», — деді Смадияров.

Ол қазақстандықтардың шетелден жеңіл әрі жоғары жалақы табуға ұмтылатынын, бірақ шетелде ешкімнің күтіп отырмайтынын айтты. «Әр адам іздеймін десе табады. Егер білімі жоғары болса, тілдерді меңгерсе, елден де жұмыс табуға болады. Тек оңай ақша және жоғары жалақы іздегендер шетелге кеткісі келеді. Әлеуметтік желіні қарайды, «оңай екен» деп ойлайды», — деді министрлік өкілі.

Айбек Смадияровтың айтуынша, шетелге жұмысқа кеткісі келгендер міндетті түрде келісімшартты тексеріп, заңгерлермен ақылдасып, сақтандыру талаптарына көз жеткізуі керек. «Осының бәрін тексермейді, бара береді», — деді ол.

Ресми өкіл шетелге баратын азаматтарды барынша мұқият болуға шақырып, жеңіл ақшаға алданып қалмауға кеңес берді.

Посмотреть эту публикацию в Instagram

Публикация от Sn.kz ақпарат порталы (@sn.kz_media)