Алматыда 13 адамның өмірін қиған хостелдегі өртке қатысты сот үкімі шықты.

Сот шешімімен ғимаратты жалға алған хостел иесі Әділбек Мұхамедияровқа 5 жыл бас бостандығынан айыру жазасы кесілді. Ал өрт қауіпсіздігі жүйесіне жауапты маман Александр Пекельник 4 жылын темір тордың ар жағында өткізеді. Айта кетейік, қайғылы жағдай 2023 жылдың бірінші қарашасында болған еді. Әди Шәріпов пен Қабанбай батыр көшелерінің қиылысында орналасқан хостелде таң ата өрт шыққан. Ғимараттың бірінші қабатында тұратындар сыртқа шығып үлгерген. Ал жертөледе болған 13 адам ажал құшты. Өрт бойынша қылмыстық іс Алмалы аудандық сотында қаралды. Тараптар сот шешімімен келіспеген жағдайда қайта шағымдана алады.

Ернар Қасымбеков, Алмалы аудандық сотының судьясы:

- Мұхамедияров оқиғаға бір апта қалғанда матрацтар алып, сол керегелерге сүйеп қойған. Жертөленің қосымша есігін бекітіп қойған. Нәтижесінде жертөлеге қандай да бір ауа кірмеген сырттан. Өрт кезінде жаңағы айтқан матрацтар жанып, соның түтінінен жәбірленушілер қайтыс болған, өкінішке орай. Мұхамедияровтың бұл қылмыс жасаудағы кінәсі іс материалдарымен толық дәлелденді.