Балалары түнгі уақытта көшеде жүргені үшін 74 мың ата-ана жауапкершілікке тартылған , деп хабарлайды 24kz.

«Жасөспірім» жедел профилактикалық шарасы барысында кәмелеттік жасқа толмағандарға қатысты заңбұзушылықтардың алдын алу жұмыстары жүргізілді. Оның ішінде балаларға ішімдік пен темекі сатуды болдырмау бойынша шаралар атқарылды. Сонымен қатар суық қаруды анықтап, тәркілеу жұмыстары өткізілді. Қазір учаскелік полицейлер жазғы лагерьлерде де жұмыс жүргізіп жатыр. Онда балғындарға жол ережелері мен қауіпсіздік қағидалары түсіндіріліп, құқықбұзушылықтың алдын алу шаралары туралы айтылады.

Ботакөз Жалекешова, ҚР ІІМ Әкімшілік полиция комитетінің өкілі:

- Алты айдың қорытындысымен 74 мыңға жуық ата-ана жауапкершілікке тартылды. Яғни, бұл жерде ҚР Әкімшілік-құқықбұзушылық кодексінің 442-бабын бұзған. Яғни, түнгі уақытта заңды өкілінсіз балалары үйден тыс жерде жүрген. Бұдан бөлек, осындай түнгі уақытта, сағат оннан кейін заңды өкілетсіз ойын-сауық мекемесіне кіргізгені үшін 1400-ге жуық әкімшілік жауапкершілікке тартылды.