Қапшағайда қыз суға батып кеткен. Мәжіліс депутаты Бақытжан Базарбек қайғылы оқиғаның куәгері болған. Бұл туралы ол әлеуметтік желіде жазды, — деп хабарлайды Massaget.kz тілшісі.

Депутаттың сөзінше, отбасымен Қапшағай жағасына демалуға барған, бұл үшін "қоғамдық жағажай" деп аталатын жерді таңдаған. Алайда қайғылы оқиғаның куәсі болыпты.

"Көз алдымда бір қыз қаза тапты. Оны құтқарып қалуға болар еді. Біріншіден, біз демалған жағажайда (және жалпы заңнама талаптарына сәйкес) бейнебақылау камералары, құтқару шеңберлері, құтқару мұнаралары орнатылуға тиіс, құтқарушыларда дүрбілер, алғашқы медициналық көмек көрсете алатын медицина қызметкері, дауыс зорайтқыш, ақпараттық тақталар болуы керек. Өкінішке қарай, бұлардың ешқайсы жоқ! Халықтан тек ақша жинап, демалуға қолайлы, өркениетті жағдай жасалмаған", — деді депутат.

Оның сөзінше, суға кеткен қызға алғашқы көмекті қарапайым куәгерлер мен марқұмның туыстары көрсетуге тырысқан.

"Демалыс аймағының әкімшілігі де, иелері де, құтқарушылар да болған жоқ. Қызды құтқарғандар — құтқарушылар емес, қайықты жалға беретін қарапайым қайықшылар мен туыстары, куәгерлер. Осындай "жабайы" жағдайда, Қапшағай жағажайларында суға кетіп жатсаң, сені кәсіби құтқарушылар емес, теледидардан құтқару тәсілін көрген қарапайым демалушылар құтқаратынын, ал алғашқы көмекті дәрігерлер емес, сол демалушылар көрсететінін түсінесің", — деді ол.

Депутаттың пікірінше, демалыс аймақтары мен жағажайлар — жергілікті прокурордың, бұрынғы облыс әкімінің орынбасарының, аудандық полиция басқармасы басшысының, жергілікті депутаттың меншігінде.

Бақытжан Базарбек осы мәселеден кейін ашық тексеріс жүргізетінін мәлімдеді.

Аптаның басты оқиғалары мен пайдалы видеоларды көру үшін YouTube арнамызға жазылыңыз