Алматыда №2 қалалық перзентханада кесарь тілігі арқылы босанған әйелдің іш қуысында дәрігерлер дәке қалдырып кеткені анықталды, деп хабарлайды El.kz интернет порталы.

Жәбірленушінің мүддесін қорғап жүрген заңгер Анна Чернованың айтуынша, оқиға 2023 жылдың тамыз айында болған. Отадан кейін-ақ науқас қатты ауырсынуға шағымданып, ультрадыбыстық зерттеуді мұқият қарауды талап еткен, алайда дәрігерлер оны жай ғана тексеріп, «бәрі дұрыс» деп үйіне шығарған.

Келесі 9 ай бойы әйелдің жағдайы нашарлаған. Ол дұрыс ұйықтай алмай, тамақ іше алмай, тіпті жаңа туған сәбиін көтере де алмаған. Қанша жекеменшік клиникаға барып, түрлі тексерулерден өткенімен, нақты диагноз қойылмай, шығыны көбейіп кеткен. Тек 2025 жылдың мамыр айында жүргізілген компьютерлік томография әйелдің жамбас қуысында бөгде зат барын көрсетіп, дереу ауруханаға жатқызылған.

3 маусымда жасалған күрделі операция кезінде дәрігерлер әйелдің ішінен кесарь тілігі кезінде ұмытылып кеткен дәкені алып шыққан. Бұл зат 9 ай бойы іріңді қабыну туғызып, перитонит пен ішкі ағзалардың бұзылуына әкеліп соққан. Соның салдарынан ішектің бір бөлігін алып тастауға тура келген.

Ота жеті сағатқа созылды. Операцияға төрт хирург қатысты, – деп нақтылады заңгер.

Дәрігерлер тағы бір апта кешіккенде, келіншектің өмірін сақтау мүмкін болмайтынын айтып отыр.

Қазір ол калоприемникпен өмір сүріп жатыр және ішегін қалпына келтіруге бағытталған тағы бір күрделі операцияны күтуде. Бірақ бұл операцияны организм толықтай қалыпқа келіп, оңалтудан өткен соң, яғни бір жарым жылдан кейін ғана жасауға болады. Осы уақыт бойы әйел сыртқы стомамен, шектеулермен, ауырсынумен және жайсыздықпен өмір сүреді. Бұл – тағы бір жарым жылдық азап, белгісіздік пен үміт күту. Дәрігерлер оның толыққанды өмірге оралуына кепілдік бермейді, – деді Чернова.

Алматы қоғамдық денсаулық басқармасы бұл жағдай бойынша денсаулық сақтау министрлігінің медициналық және фармацевтикалық бақылау комитетіне тексеріс жүргізу туралы өтініш жолданғанын хабарлады.

Тексеру қорытындысы бойынша ресми түсініктемелер беріледі және қолданыстағы заңнама аясында тиісті шаралар қабылданады, – делінген басқарма хабарламасында.