Жарылыс толқыны қатты болғаны соншалық, жұмысшылардың кейбірін тіпті 100 метрге дейін ұшырып жібергені айтылды.

Үндістанда химия зауытындағы жойқын жарылыс 40-қа жуық адамның өмірін жалмады, деп хабарлады 31 арнаның Информбюро ақпараттық бағдарламасы.

Қаралы тізім әлі толығуы мүмкін. Себебі, фармацевтикалық кәсіпорын отқа оранған сәтте ішінде 90-ға жуық жұмысшы болған екен.

ТелАнгана штатындағы қайғылы оқиға дүйім елді есеңгіретті. Күні кеше нысанның ішінде қатты дүмпу болып, арты алапат өртке ұласқан.

Жарылыс толқыны қатты болғаны соншалық, жұмысшылардың кейбірін тіпті 100 метрге дейін ұшырып жібергені айтылды.

Дей тұра, көбі үйіндінің астында қалған көрінеді. Құтқарушылар екі күннен бері мәйіттерді қирандының астынан шығарып жатыр. Кейбірінің денесі әлі табылмай, із-түссіз жоғалғандардың қатарына енген.

Қазір құзырлы орган өкілдері жарылыстың нақты неден туындағанын анықтауда. Әрі, қауіпсіздік шараларының қаншалықты сақталғаны тексеріліп жатыр. Енді фармацевтикалық кәсіпорынға иелік ететін компания қаза тапқандардың отбасына 10 миллион рупий, яғни 60 миллион теңге өтемақы төлеуге міндеттелмек. Үкімет те осы мөлшерде өтемақы төлейді.