АҚШ азаматы Джо Димео – әлемде алғаш рет бір уақытта беті мен екі қолы трансплантацияланған адам. Ол People журналына берген сұхбатында жан түршігерлік апаттан кейінгі бастан өткерген сезімдерімен бөлісті, деп хабарлайды El.kz интернет порталы.

Джоның өмір үшін күресі медицинада теңдессіз жағдай ретінде бағаланып отыр.

2018 жылы 20 жастағы Джо көлік жүргізіп келе жатып ұйықтап кетіп, жол апатына ұшырады. Көлік трассадан шығып кетіп, әп-сәтте өртеніп кеткен. Ауыр апат салдарынан оның денесінің 80%-ын, соның ішінде беті мен қолдарын үшінші дәрежелі күйік шалды.

Дәрігерлер оның өмірі үшін күресіп жатқанда, Джо үш ай бойы комада жатты. Ол осы кезеңде ерекше сезімдер мен көріністерді бастан өткергенін айтады.

Комада жатқан кезімде де айналамдағы адамдардың дауысын анық естіп жаттым, — дейді Джо. Оның айтуынша, сол кезеңде түстер жиі көрген.

Ең есте қалған сәт — бұрын өлген сүйікті итімен бірге төбеде серуендеп жүргені туралы көрініс.

Меніңше, бұл — арғы өмірдің көрінісі шығар, — дейді ол.

22 жасында Джоға тарихта алғаш рет бет пен екі қолды бір уақытта ауыстыру операциясы жасалды. Бұл күрделі отаны 140 медицина маманынан тұратын топ жүргізді. Донор – 47 жастағы ер адам. Қазір Джо қалыпты өмір сүруге бейімделіп келеді.