Мамандардың айтуынша, есте сақтау қабілетінен айырылған зейнеткерді қыздары осы орталыққа тапсырып кеткен.

Петропавлдағы жалғыз қарттар үйінде орын жоқ. Жекеменшік орталықтың басшысы жергілікті биліктен көмек сұрап отыр, деп хабарлады 31 арнаның Информбюро ақпараттық бағдарламасы.

Себебі, қараусыз қалған қариялар қайда барарын білмей жүр дейді. Кезегін күтіп, жалғыздықтан жабырқаған зейнеткерлерді уайымдаған кәсіпкер ғимаратты кеңейтуді жоспарлаған. Алайда оған қаражат та, ғимарат та жоқ екен. Жасы жетпістен асқан Загара Саидованың қарттар үйін мекен еткеніне бес жылға жуықтаған. Жүріп-тұруы қиын кейуанаға қызметкерлер көмектеседі.

Мамандардың айтуынша, есте сақтау қабілетінен айырылған зейнеткерді қыздары осы орталыққа тапсырып кеткен.

"Үш қызым бар. Үшеуі де тұрмыс құрып, үш жаққа кетті. Жанұясы, жұмысы болғандықтан маған қарай алмайды. Сондықтан өзім де осы жаққа сұранып келдім десек те болады", – деді зейнеткер Загара Саидова.

Расыменде, қарттар үйіне сұранып келетіндер күрт көбейді дейді жекеменшік орталықтың басшысы. Бірақ бұл жер ата-әжелерге лық толған. Орын жоқ. Кезекке тұрғандарға қол ұшын соза алмай қиналдым деген кәсіпкер әкімдіктен көмек сұрап отыр.

"Қарттар кішкентай бала сияқты. Үнемі бақылап, көңілін аулап жүреміз. Бізге келгісі келетіндер өте көп. Бірақ орталығымызға бәрін бірдей сыйдыра алмаймыз. Кеше ғана екі адам сұранып келді. Біз қабылдай алмадық. Әрі біз осы жерді жалдап тұрғандықтан, жалға беру құнын да өсіріп жіберді. Ғимаратты кеңейту керек", – дейді жекеменшік қарттар үйінің басшысы Лилия Даниленко.

Ал шенеуніктер жалғыз қалған зейнеткерлерді Тайынша қаласы мен Смирнов ауылындағы қарттар үйіне орналастыра аламыз деп отыр. Ал қалада жаңа әлеуметтік мекеме салу күн тәртібінде жоқ екен.