Мұндай тосын жаңалықты ҚР Оқу-ағарту министрлігі мәлімдеді.

Яғни, ел мектептеріне оқушыларды кәсіптік бағдарлауға бағытталған жаңа цифрлық құрал енгізілуге жақын, деп хабарлайды inbusiness.kz сайты.

Осылайша, Ы.Алтынсарин атындағы Ұлттық білім академиясы "Еңбек ресурстарын дамыту орталығы" АҚ-мен бірлесіп оқушыларға кәсіптік бағдар берудің "Оқушының қызығушылықтары мен дағдыларының икемді бейіні" (ОҚДИБ) цифрлық әдістемесін әзірлеп отыр.

Бұл бастама 7-9-сынып оқушыларына кәсіпті ерте жастан таңдауды қалыптастыруға, үйретуге бағытталған.

Әдістеменің оқушылар қызығушылығын айқындауға, қабілетін анықтауға және одан әрі даму үшін оңтайлы бағыттарды таңдауға көмектесетіні айтылады. Әзірлеме еліміз бойынша 10 мыңнан астам оқушы қатысқан сынақтан сәтті өтті.

– Бұл құрал университеттердің 400-ден астам бағдарламасы, колледждердің 200-ге жуық мамандығы мен жұмысшы кәсіптерін біріктіретін Мансап компасы цифрлық платформасына енгізілген. Платформа оқушылардың, педагогтердің және ата-аналардың жеке кабинеттеріне қол жеткізуді қамтамасыз ете отырып, бір цифрлық кеңістікте жүйелі кәсіптік бағдарлауды қамтамасыз етеді. Тест нәтижелері автоматты түрде өңделеді: оқушылар жеке ақыл-кеңестер, педагогтер заманауи сүйемелдеу құралдарын, ал ата-аналар баланың даму сараптамасы мен динамикасы туралы ақпарат алады, – деді Алтынсарин академиясының президенті Нәзипа Аюбаева.

Оның сөзінше, жоба жалпы білім беретін мектептерге заманауи, тұрақты және болашаққа бағдарланған кәсіптік бағдарлау жүйесін құруға жағдай жасайды, ұстаздардың жұмысын жеңілдетеді. Яғни, әрбір балаға болашақ кәсіби жолын саналы әрі сапалы таңдауға мүмкіндік сыйламақ.