Электр жарығы мен ауыз су тапшылығы өңірге инвестор тарту ісіне айтарлықтай кедергі келтіріп отыр.

Қазақстандағы ең ірі су айдындарының бірі – Балқаш көлінің туристік әлеуеті толық пайдаланылмай отыр. Талдықорған арқылы апаратын жаңа жолдың ашылғанына қарамастан, көл жағалауындағы инфрақұрылым әлі де көңіл көншітпейді. Электр жарығы мен ауыз су тапшылығы өңірге инвестор тарту ісіне айтарлықтай кедергі келтіріп отыр. Бұл проблеманы жергілікті әкімдік те мойындап, нақты шешімдер қолға алынғанын мәлімдеді, деп хабарлайды 31-арнаның "Информбюро" ақпараттық бағдарламасы.

Жазғы маусым ашылғанымен, Балқашқа демалуға келгендердің айтуынша, көл табиғаты мен суының сапасына еш сын жоқ. Мамыр айының соңынан бастап суға шомылып, қармақ салушылар көбейген. Бірақ жағалауда туристерге қолайлы жағдай жасалмағаны демалыстың шырқын бұзады.

Туристердің сөзіне сенсек, Балқаш көліне адамдар жаздың бірінші күнінен бастап келе бастайды. Себебі бір жағы ащы, екінші жағы тұщы көлдің суы жаз бойы жылы тұрады.

Оқи отырыңыз: Жетісу облысында Балқаш көліне апаратын жол ашылды

Қауіпсіздік мақсатында құтқарушылар жұмыс істеп жатқанымен, Жетісу облысына қарасты жағалауда қызмет көрсететін тек 17 демалыс орны ғана бар. Бұл – Балқаштың мүмкіндігіне сай көрсеткіш емес. Жауапты мамандар бұл жағдайды жарық пен су тапшылығымен байланыстырады. Аталған мәселелер биылғы тамыз айында шешіледі деп жоспарланса, жол проблемасы 2026 жылға қарай толық реттелмек.

"Бұл мәселе облыс әкімінің тікелей бақылауында. Алдымен жарық пен суды жеткізу жұмысын аяқтаған соң, инвесторларды өзіміз тартатын боламыз. Жобалар аукцион арқылы жүзеге асырылады", – деді Айдос Бекетаев, Жетісу облысының энергетика және тұрғын үй-коммуналдық шаруашылығы басқармасының басшысы.

Айта кетейік, Балқашқа Талдықорғанмен жалғайтын жол 2018 жылдан бері салынып келеді. Қаржының жеткіліксіздігі себепті құрылыс жұмыстары баяу жүрген. Қазіргі таңда жолдың көлге апаратын бөлігі пайдалануға берілген. Әкімдіктің мәліметінше, осы жолдың ашылуы өткен жылы 5 мыңнан аспаған турист санының төрт есе артуына ықпал еткен.