Теміржол құрамы жалпы салмағы 1,7 мың тонна болатын 62 контейнерден құралған.

Жоғары сапалы бидай тиелген транзиттік контейнерлік пойыз Қытайдың Ляньюньган портына жетті. Бұл – Вьетнамға арналған және "Азық-түлік келісімшарт корпорациясы" жіберген сегіз құрамның алғашқысы. Астық тасымалдау мультимодальды бағыт бойынша жүзеге асырылды, деп жазады inbusiness.kz сайты корпорацияның баспасөз қызметіне сілтеме жасап.

Контейнерлер теңіз кемелеріне қайта тиелгеннен кейін, бидай Вьетнамның Хайфон портына жеткізіледі.

Қытайлық БАҚ атап өткендей, Ляньюньган портындағы логистикалық база "бір контейнер бір сервис" қағидасымен жұмыс істейді. Бұл – модель бойынша жүктің бастапқы нүктеден соңғы межеге дейін қайта тиеусіз бір контейнерде жеткізілуі қамтамасыз етіледі. Осы технологияның арқасында теміржолдан теңіз портына өту уақыты небәрі бір сағат уақытты алады. созылды. Сонымен қатар, қазақстандық бидай барлық рәсімдер жедел түрде жүргізілетін "жасыл дәліз" арқылы жеткізілді.

– "Бастапқы нүктеден соңғы межеге дейін бір контейнерде жеткізу" форматы Оңтүстік-Шығыс Азияға бағытталған қазақстандық экспортқа сапалы әрі тиімді құрлықтық-теңіздік интермодальды қызмет көрсетуді қамтамасыз етті. Бұдан бөлек, біздің логистикалық базамыз кеден, порт, теміржол және басқа да ведомстволардың қолдауына ие болды. Соның нәтижесінде порттағы жүктің рәсімделу тиімділігі 70%-ға артты, – деп мәлімдеді Ляньюньган қаласындағы Қытай-Қазақстан логистикалық ынтымақтастық базасының бас директоры Гэ Хэнсюэ.

Алғашқы бидай партиясы Ақмола облысындағы астық қабылдау кәсіпорындарында дайындалған. Жалпы, Вьетнамға шамамен 15 мың тонна азықтық бидай жөнелтіледі деп жоспарланып отыр.

"Азық-түлік келісімшарт корпорациясы" ҰК" АҚ басқарма төрағасы Асылхан Жүнішевтің айтуынша, жаңа логистикалық бағыттар қазақстандық аграршылар үшін алыс шетел нарықтарына шығуға жол ашып отыр.

Жыл басынан бері "Азық-түлік келісімшарт корпорациясы" экспортқа 196 мың тонна астық жөнелтті. Ең ірі партиялар Солтүстік Африка, Оңтүстік-Шығыс Азия және Иран нарықтарына жіберілмек.

Ал, қазақстандық астықты Вьетнамға сәтті жеткізу туралы журналистер Қытайдың орталық телевизиясы (CCTV) мен Қытай халықаралық телевизиялық желісі (CGTN) эфирінде хабарлады.