Сәкен Майғазиевтің ұлының тойын тікелей эфирде көрсетіп, пайда тапқаны үшін салық төлеуге міндетті. Қаржы министрі Мәди Такиевтің сөзінше, әнші тойдан тапқан пайдасын келер жылы декларация тапсыратын кезде көрсетіп, салығын төлеуі керек

Бұл туралы Caravan.kz медиа порталы baq.kz-ке сілтеме жасап хабарлайды.

Әнші Сәкен Майғазиевтің ұлының тойын тікелей эфирде ақылы түрде көрсеткені қоғамда қызу талқыланды. Бұл жағдай салық органдарының назарынан тыс қалған жоқ.

Мәжіліс кулуарында Қаржы министрі Мәди Такиев осы мәселеге қатысты сұраққа жауап берді.

Сәкен Майғазиев кейсі бойынша салық мәселесі қалай реттеледі? Бұл мәселе бақылауға алынды ма? Сәкен Майғазиев тойын тікелей эфирден көрсетіп, пайда тапқаны үшін қанша салық төлеуі қажет? – деп сұрады БАҚ өкілдері.

2025 жыл аяқталған соң, 2026 жылдың 31 наурызына дейін декларация тапсыруы қажет. 2025 жылы алынған кірістері бойынша салық төленеді. Ол кісінің 2025 жылы нақты қанша табатынын білмеймін, — деп жауап берді Мәди Такиев.

Бұған дейін Сәкен Майғазиев ұлының үйлену тойын онлайн көрсетіп, тіркелгендерден 1380 теңгеден жинағаны жайлы ақпарат тарады. БАҚ беттеріндегі мәліметке сәйкес, онлайн тойды 5 мыңнан аса адам қараған.