Танымал кәсіпқой боксшы Айдар Шәрібаев қауіпсіздік мақсатында әр отбасыда қару болу керек екенін айтты.

Бұл туралы ол әлеуметтік желідегі парақшасында видео жариялап, қару алудың маңыздылығына қатысты өз ойымен бөлісті, деп хабарлайды Caravan.kz медиа порталы.

Спортшы жариялаған видеода оның қару асынып тұрғанын байқауға болады. Оның айтуынша, елімізде қару ұстайтын адамдар саны неғұрлым көп болса, қылмыс саны да соғұрлым азаяды-мыс.

”Алматыдағы мылтық алатын жерде бұрындары 80% орыстар жүретін еді. Қазір құдайға шүкір, 90% қазақтар. Қазақтар оянып жатыр, қазақтар мылтық сатып алып жатыр. Неге? Өйткені, жар астында жау жоқ деме дейді. Қай кезде болсын ол сенен нан сұрап тұрған жоқ. Бес қаруың сай болсын дейді ғой, мылтық керек. Біреуді ату үшін емес, өздеріңді, жақындарыңды қорғау үшін. Сондықтан өз басым болғаны дұрыс деп ойлаймын. Қазір еркектер Instagram-нан шықпайтын болды. Тауға, аңға шығу керек. Тестесторон сол кезде мықты болады. Одан бөлек, еліміздің дамуына тікелей әсер етеді. Швейцария елінде біздегі сияқты “кезінде 2 жыл әскерде болып едім, бәрін ұрып едім” демейді. Швейцарияда 2 жылды айға бөліп тастайды. Ол жақта кезінде әскерде мықты болып, қазір қарны шығып кеткендер жоқ. Ай сайын мылтық атуға барып тұрады. Сол үшін оларда 8 миллион халық, әйелі де, баласы да мылтық ата алады. Елдерінде қылмыс деген де жоқтың қасы. Бізде не үшін бір біріне күш көрсету, көшенің әңгімелері әлі де жатыр? Өйткені, мылтық әркімде жоқ. Мылтық әркімде болса, басында жындылар бір бірін қырып, бірақ тыныштылады. Себебі, біреудің құқығын таптауға болмайтынын бәрі түсінеді. Бәрінде мылтық бар екенін біледі. Америкада барлығында мылтық бар. Былай қарасаң, ешкімнің құқығын ешкім таптап жатқан жоқ. Сол үшін біздің елге де керек деп ойлаймын. Әрине, бірінші білім, заңдылық керек. Қару қалай ұстау керегін біліп, есі дұрыс болу керек. Елімізде мылтық ұстай алатын адамдар көп болса, бәрі күшті болады”, — дейді ол.

Желі қолданушылары мұндай бастаманың қауіпті екенін айтып, видеоны өшіруді талап етуде.

”Видеоны өшіріп, кешірім сұрағаныңызды күтеміз”, “Атыс-шабыс көбейіп, Бразилия сияқты болып кетеміз”, “Мұндай пікірді халыққа айтып, үндеу жасау дұрыс емес. Сізді тыңдап отырған жастар дұрыс түсінбей қалып, бәлеге ұрынып қалмайтынына кім кепіл”, — деп жазуда олар.