Бұл туралы Еңбек және халықты әлеуметтік қорғау министрлігі хабарлады, деп жазады inbusiness.kz сайты.

2025 жылғы 16 маусымнан бастап Қазақстанда атаулы әлеуметтік көмек (АӘК) тағайындау мен төлеудің жаңартылған қағидалары күшіне енеді. Тиісті бұйрыққа ведомство басшысы 30 мамырда қол қойған.

Жаңа тәртіптің басты мақсаты — әлеуметтік көмекті әділ әрі нақты мұқтаж жандарға бағыттау. Енді АӘК тағайындау кезінде өтініш берушінің кірісімен қатар шығысы да ескеріледі. Министрлік өкілдерінің айтуынша, бұл өзгеріс мемлекеттік қолдауға шын мәнінде мұқтаж азаматтарды анықтауға мүмкіндік береді.

Өтініш беруші мен оның отбасы мүшелері туралы барлық мәлімет электрондық үкімет жүйесі арқылы автоматты түрде жиналады. Оған азаматтық мәртебесі, тіркеу мекенжайы, көлік пен мүлік иелігі, депозиттер, банк қарыздары, ресми табыс пен шығыс (соның ішінде банк карталарымен жасалған төлемдер) туралы ақпараттар кіреді.

Сонымен қатар, отбасы мүшелерінің жұмысқа жарамдылығы, біліктілігі, жұмысқа орналасуы, оқуы, алимент алуы сияқты деректер де есепке алынады.

Министрлік бұл қадам әлеуметтік көмекті тек шын мұқтаж азаматтарға бағыттауға мүмкіндік береді деп отыр.