Бүгін Ұлттық құрылтайдың құрылғанына үш жыл толды.

Мемлекеттік кеңесші Ерлан Қарин бұл институттың жұмыс нәтижесі жайлы әлеуметтік желіде жазды. Құрылтай Президенттің «Халық үніне құлақ асатын мемлекет» тұжырымдамасын жүзеге асыруға зор ықпал етіп келеді. Оның құрамы үнемі жаңартылып отырады. Құрылтай мүшелері құрылымның бұған дейінгі 4 отырысы мен жұмыс кездесулерінде көптеген бастама көтерді. Атап айтқанда, қоғамда еңбек құндылығы идеологиясын ілгерілету, тіл саясатын дамыту, есірткі мен заңсыз ойын бизнесіне қарсы күрес, волонтёрлікті дамыту сияқты маңызды құжаттарды қабылдау ұсынылды. Құрылтайдың гуманитарлық бағыттағы жұмыстары да айрықша мәнге ие. «Әзірет Сұлтан» тарихи-мәдени музей-қорығына ұлттық мәртебе берілді. Яссауи мұраларын зерттеуге арналған ғылыми орталық құрылды. «Адал азамат» біртұтас тәрбие бағдарламасы дайындалды. Ұлттық кітап күні белгіленді. Құрылтайда көтерілген бастамаларды жүзеге асыру аясында 16 заң қабылданды. Бұған қоса, тағы 5 заң жобасы әзірленіп жатыр. Үкімет Құрылтайдың үшінші отырысының қорытындысына сәйкес 2029 жылға дейінгі ұлттық инфрақұрылым жоспарын бекітіп, жүзеге асырып жатыр. Ал құрылтайдың 4-отырысында Мемлекет басшысы Тәуелсіздіктің 40 жылдығына дейінгі ел дамуының бес басым бағытын айқындап берді. Бұл цифрландыру және жасанды интеллект, көлік және транзит, энергетика, агроөнеркәсіп секторы және адам капиталы.