Сондай-ақ спорт шаралары мен үстемақыға негізсіз жұмсалған 1,3 млрд теңге бюджетке қайтарылды.

Сыбайлас жемқорлыққа қарсы қызмет Туризм және спорт министрлігімен бірлесіп өткен жылы спортты қаржыландыру саласындағы сыбайлас жемқорлық тәуекелдеріне сыртқы талдау жүргізді.

Талдау қорытындысы бойынша спортты дамыту басымдықтарын қайта қарауға, оқу-жаттығу жиындарын өткізуді бақылауды қатаңдатуға, кәсіби клубтар мен федерациялардың бюджеттерін қысқартуға, қаржыландыруды орталықтандыруға, сондай-ақ цифрландыруды енгізуге бағытталған 50-ден астам ұсынымдар енгізілді.

"Оларды қарау нәтижелері бойынша 2024 жылғы желтоқсанда және 2025 жылғы наурызда бірқатар салалық ережелерге түзетулер енгізілді. Енді футбол кәсіпқой клубтары үшін мемлекеттен қаржыландыру алу үшін балалар-жасөспірімдер және жастар футболының жеке бөлімшелерінің, жастар командаларының, стадиондар мен сабақтар өткізуге арналған құрылыстардың болуы туралы талаптар қолданылады. Оқу-жаттығу жиындарына бақылау күшейтілді, оларды өткізуге лимит белгіленді", – делінген агенттік хабарламасында.

Оқи отырыңыз: Қалың малды толық қайтарып алуға бола ма? Заңгер жауабы

Агенттіктің ұсынымдары бойынша ағымдағы жылы 15 сәуірде "Дене шынықтыру және спорт туралы" Заңға Туризм және спорт министрлігінің кәсіби спорт клубтарын ұстауға бөлінетін бюджет қаражатының лимитін, сондай-ақ Қазақстан Республикасының азаматтары болып табылмайтын спортшыларды бюджет есебінен қаржыландыруға тыйым салуды бекіту жөніндегі құзыретін көздейтін толықтырулар енгізілген.

"Мемлекет басшысының тапсырмасын орындау аясында кәсіби спортты, оның ішінде футбол клубтарын қаржыландыру 6,7 млрд теңгеге (60,5-тен 53,8 млрд теңгеге дейін) қысқартылды. Спорттық іс-шараларға және жалақыға үстемеақыға негізсіз жұмсалған 1,3 млрд теңге бюджетке қайтарылды. Басқарудың тиімсіздігіне байланысты 11 спорт нысаны мемлекеттік мекемелердің балансына берілді. Қабылданған шаралар отандық спортты және өскелең ұрпақтың спорттық әлеуетін дамытуға бағытталған", – деді агенттік өкілдері.