Заң 30 маусымда күшіне енген соң, тұрғын үй төлемдері басталады.

Төтенше жағдайлар вице-министрі Кеген Тұрсынбаевтың айтуынша, биыл шамамен 18 мың төтенше жағдайлар министрлігінің қызметкері тұрғын үй жәрдемақысымен қамтамасыз етіледі. Бұл төлемдер тұрғын үй бағасының өсуі, инфляция деңгейі, қызмет атқаратын өңірдің ерекшеліктері және қызметкердің отбасы жағдайына қарай өзгеріп отырады.

Құтқарушыларға арналған тұрғын үй төлемдері олардың тұрмыстық жағдайларын жақсарту және қызметте ынталандыру мақсатында беріліп отыр.

"Астана қаласында шамамен 92 мың теңге. Аталған сома жыл сайын өзгеріп отырады. Үкімет тұрғын үйді жалға алу құнын реттейді. Өскеменде − 49 мың теңге, Семейде − 48 мың теңге. Әр қалада бір адамға арналған төлем сомасы үкімет қаулысымен бекітіледі", − деп түсіндірді Кеген Тұрсынбаев.

Оқи отырыңыз: Елорда студенттеріне оқу ақысын төлеуге әлеуметтік көмек көрсетіледі

Вице-министрдің айтуынша, үкіметтің қаулысымен төрт адамнан тұратын отбасыға ай сайын шартты түрде 50 мың теңгеден есептеледі. Осыған сәйкес, әр отбасыға жалпы 200 мың теңге көлемінде қаржылай қолдау көрсетіледі. Бұл шешім отбасылардың экономикалық жағдайын жақсартуға бағытталған мемлекеттік шаралардың бірі.

"Заң 30 маусымда күшіне енген соң, тұрғын үй төлемдері басталады", – деп қосты Кеген Тұрсынбаев.