Наразы топтың есептеуінше, берешек сома шамамен 100 миллион теңгеге жуықтайды.

Күні-түні жүк көліктерімен топырақ тасып, дамбы салуға қатысқан елуге жуық адам мердігер компанияның есігін тоздырған. Алайда осы күнге дейін нақты нәтиже жоқ. Қаржылық қиындыққа тап болған жұмысшылар енді жергілікті биліктен көмек сұрауға мәжбүр, деп хабарлайды 31-арнаның "Информбюро" ақпараттық бағдарламасы.

Бөгет салу жұмыстарына атсалысқан азаматтар тасқын қаупі төнген кезде техниканы өз қаражаттарына несиеге алып, топырақ тасығандарын айтады. Жұмыс күші жетіспегендіктен, қара жұмысты да өздері істеген. Алайда мердігер мекеме жанармай шығындарын ғана өтегенін айтып, наразылық білдіруде.

"Бұл жерде күні-түні дамбы салып еңбек еттік. Бөгет уақтылы аяқталды, алайда содан бері қаншама уақыт өтсе де, еңбекақымызды әлі алған жоқпыз. Әрқайсымыздың несиеміз бар, отбасымызды асырауымыз керек. Өз басым – мүгедек баланы тәрбиелеп отырған әкемін. Барлығы қымбаттап кетті, күн көру қиын", – жұмысшы Ғалымжан Демесінов.

Оқи отырыңыз: "Монша бағасы күрт өсті". Петропавлда бірнеше аудан тұрғындары ыстық сусыз қалды

Жұмысшылар төтенше жағдай кезіндегі еңбектері үшін тиісті төлемді әлі ала алмай, тығырыққа тірелген. Олардың айтуынша, мердігер компания бір жылдан бері әртүрлі уәделермен созып келе жатыр. Наразы топтың есептеуінше, берешек сома шамамен 100 миллион теңгеге жуықтайды.

"Ақжар мен Ақсай ауылдарының ортасында дамбы салдық. Содан бері ақшамызды ала алмай жүрміз. Бір жылдан асты. Бізді "Абадан Алаш" ЖШС төтенше жағдай кезінде жұмысқа алған. Екі шақырымнан астам бөгет салдық, биіктігі төрт метрден асады", – деді жұмысшы Байжан Тұрғалиев.

Мердігер компанияның өкілдері жұмысшылардың еңбекақысы толық төленбегенін мойындайды. Олардың айтуынша, әкімдік қаржыны толық аудармаған. Алайда жергілікті билік бұл мәлімдемені жоққа шығарады.

"Абадан Алаш" мекемесіне 2,33 шақырымдық дамбыны көтеру және бекіту жұмыстары үшін қаражат толық аударылды. Бүгінгі күнге дейін 91 миллион 70 мың теңге төленді. Яғни, мердігерге барлық қаражат берілген", – деді Қайыршақты ауылдық округінің әкімі Шафхат Қалиев.

Оқи отырыңыз: Оқу ақысын төлейтін әлеуметтік көмек: Астанада кімдер үміткер бола алады?

Жұмысшылардың айтуынша, екі тарап арасындағы келіспеушілік салдарынан зардап шегетін өздері болмауы тиіс. Сондықтан олар еңбекақыларын облыс әкімдігінен талап етпек.