Бұл жағдайды жеке кәсіпкерлер пайдаланып, қоғамдық моншалардағы қызмет бағасын күрт өсіріп жіберген.

Қаладағы жүзге жуық көпқабатты үйдің тұрғындары бір айдан бері ыстық судың жоқтығынан жуыну мүмкіндігінен айырылғанын айтады. Соның салдарынан халық арасында жұқпалы аурулардың таралу қаупі туындап, педикулездің өршуінен қауіптеніп отыр. Бұл жағдайды жеке кәсіпкерлер пайдаланып, қоғамдық моншалардағы қызмет бағасын күрт өсіріп жіберген, деп хабарлайды 31-арнаның "Информбюро" ақпараттық бағдарламасы.

Сусыз қалған тұрғындардың бірі – Қожахмет Әйтеновтың айтуынша, мамыр айында мамандар ыстық суды өшіріп, жөндеу жұмыстарына кіріскен. Алайда содан бері қаланың жарты бөлігінде ыстық су қайта қосылмаған. Халық ұзақ уақыт бойы гигиеналық талаптарды орындай алмай отырғандықтан, түрлі аурудың таралуынан алаңдаулы.

"Қазіргідей ыстықта аптасына бір емес, екі-үш рет жуыну қажет. Ал ыстық су болмаса, қалай жуынамыз? Денені жуу керек. Суық сумен жуынып көріңіздерші, қандай әсер болады екен?" – деді Петропавл қаласының тұрғыны Қожахмет Әйтенов.

"Жас Өркен" шағынауданындағы барлық үйлер де аптап ыстықта ыстық сусыз қалған. 25 күннен бері жуынуға мүмкіндігі жоқ тұрғындар бұл жағдай қашан аяқталады деп наразылық білдіруде. Көпшілігі туыстарына уақытша қоныстанып жатса, қалғандары ақылы моншаларға барып, ұзын-сонар кезекке тұруға мәжбүр. Кәсіпкерлер де бұл жағдайды тиімді пайдаланып, қызмет құнын арттырып жіберген.

"Моншаға барғымыз келеді, бірақ олардың бағасы қымбаттап кеткен. Бұрын осы маңдағы моншада бір адамға 2000 теңге төлейтінбіз. Қазір сол баға 3500 теңгеге дейін көтерілген. Жағдайды олар да пайдаланып жатыр", – деді Петропавл қаласының тұрғыны Бағлан Бралина.

Оқи отырыңыз: Алматыдағы Orda City тұрғын үй кешені сот шешімімен бұзылады

Жылумен қамтушы компания өкілдері құбырларды тексеру барысында 93 жерден ақау анықталғанын хабарлайды. Бұл ақауларды жөндеу үшін шамамен бір ай уақыт қажет екенін айтады. Сондықтан, қыста жылусыз қалмау үшін тұрғындар қазіргі жағдайға түсіністікпен қарауы қажет дейді.

"Мамыр айынан бастап қала бойынша он күнге ыстық су өшірілді. Бұл – келесі жылыту маусымына дайындық жұмыстары аясында жүргізілген шара. Яғни, жылу құбырларын тексеру барысында ақаулар анықталып, оларды жою бойынша жұмыстар жүргізілуде. Қазір қала бойынша 7 бригада жұмыс істеп жатыр", – деді Петропавл қаласы әкімдігінің баспасөз хатшысы Әсем Айтолла.

Оқи отырыңыз: "Аязға шыдамаған". Петропавлда құбыр жарылып, бірнеше тұрғын үй сусыз қалды

Ресми мәліметке сәйкес, қазіргі таңда 87 көпқабатты тұрғын үй ыстық сусыз отыр. Ал жауапты мамандар барлық жөндеу жұмыстары он күн ішінде аяқталады деп сендіреді.